Qozog‘istonning birinchi prezidenti Nursulton Nazarboyev umurtqasini operatsiya qildirgani davlat rahbari lavozimidan ketishining sabablaridan biri ekanini tan oldi, deya xabar tarqatgan “Interfaks”.
“Avval bu haqda umuman gapirmaganman, bu o‘ziga xos shovshuvli yangilik bo‘ladi. Men umurtqamni, belimni operatsiya qildirganman va jarrohlik amaliyoti ancha jiddiy edi”, — deya hikoya qilgan Nazarboyev “Xabar” telekanalida 21-oktabr kuni efirga berilgan “Portretga chizgilar” hujjatli filmida.
“Kasalmand prezident davlat rahbari bo‘la olmaydi. Mamlakat sening ahvoling tufayli aziyat chekmasligi kerak. Sog‘lig‘ingda muammolar bor paytda 350 ta uchrashuv o‘tkazish, safarlarni davom ettirish mumkinmi? Bu ham davlat rahbari sifatida iste’fo berishimda muhim ahamiyatga ega bo‘ldi. Men hech qachon bu haqda avval gapirmagan edim, ushbu ishim uchun hammadan kechirim so‘rayman”, — degan Qozog‘iston xalqining yetakchisi.
Nazarboyev sog‘lig‘i bilan bog‘liq muammolar katta ommaviy tadbir vaqtida 2011-yilda kuzatila boshlagani haqida ham gapirgan.
“8-mart kuni biz konsertda bo‘ldik, tomosha tugagach o‘rnimdan turdim, shu vaqtda oyog‘im yerga yopishib qolgandek qimirlay demasdi. Qo‘riqlash xizmatining zobitini chaqirdim va yonimda meni qo‘ltiqlab yurishini so‘radim, men unga: kel odamlar sezib qolmasliklari uchun juda sekin harakat qilamiz deb aytdim. Zal to‘la edi. Vaziyatdan shunday qilib chiqib ketganmiz. Keyin shifokorlar bu nima ekanini tekshira boshlashdi, menda umurtqa muammolari boshlangandi”, — degan u.
“Buni xalqqa qanday tushuntirish mumkin? Hali qilinadigan ishlar ko‘p, ketishning vaqti emasdi. Ketishga tayyor emasdim ham. Sababi merosxo‘r borasidagi masala hal etilmagan va boshqa muammolar ham bor edi. Keyinchalik bu boradagi qarorimni o‘zgartirdim. Oradan ikki yildan oshiq vaqt o‘tdi, prezidentlikdan iste’fo berib to‘g‘ri qaror qabul qilganman deb hisoblayman, afsusda emasman”, — deydi Nazarboyev.
Shuningdek, Qozog‘istonning birinchi prezidenti konsert zalida kuzatilgan holatdan avval hech ham kasal bo‘lmaganini qo‘shimcha qilgan.
Mavzuga doir:
Izoh (0)