AQSh sobiq prezidenti Bill Klinton uning sog‘lig‘i haqida qayg‘urgan barchaga videomurojaat yo‘lladi, u odamlarga minnatdorlik bildirgan va sog‘aya boshlaganini bildirgan, deb yozmoqda “Interfaks”.
“Yana uyimda ekanimdan juda xursandman. O‘zimni juda yaxshi his etyapman va kuzning ajoyib havosidan rohatlanyapman”, — deya ta’kidlagan Klinton Twitter’ga yuklagan videoxabarida.
Sobiq prezident Irvindagi Kaliforniya universiteti Tibbiyot markazi shifokorlariga tashakkurini izhor qilib, tibbiyot muassasasida davolangan vaqtida ko‘plab odamlarning unga ruhiy ko‘mak berishga harakat qilganidan qattiq ta’sirlanganini qayd etdi.
Klinton 12-oktabrda urologik infeksiya bilan bog‘liq muammo tufayli kasalxonaga tushib qolgan va u yerda umumiy hisobda besh kun davomida davolangan. Sobiq prezident shifoxonadan chiqqach, Nyu-Yorkdagi uyiga ketgan va u yerda antibiotik dori vositalari bilan davolanish kursini o‘tkazmoqda.
Klinton AQShning 42-prezidenti sifatida tarixda qolgan. U davlatni ikki prezidentlik muddati davomida — 1993—1997-yillarda va 1997—2001-yillarda boshqargan.
2021-yil 11-oktabrda Chexiya prezidenti Milosh Zeman reanimatsiyaga tushgani va shifokorlar unga qo‘yilgan tashxisni sir saqlayotgani xabar qilingan. 12-oktabr kuni kasalxonada yotgan Chexiya prezidentining vakolatlaridan mahrum qilish masalasi ko‘rib chiqilishi mumkinligi, 19-oktabrda esa Milosh Zeman Chexiya prezidenti majburiyatlarini bajara olmasligi sababli uning vakolatlari bo‘lib olinishi haqida xabar berilgan.
Izoh (0)