Сурия ҳукумати 2020 йилда қасддан ўрмон ёнғинларини юзага келтириш айби билан судланган 24 кишини қатл этганини маълум қилди. Бу ҳақда BBC News’га таяниб, «Интерфакс» хабар берди.
Мамлакат Адлия вазирлигининг маълум қилишича, яна 11 киши умрбод қамоқ жазосига ҳукм этилган, вояга етмаган беш нафар фуқарога 10—12 йил муддатга қамоқ жазоси тайинланган. Баёнотда ёнғинлар «террорчилик акти» дея тоифаланган.
Улар 2020 йилнинг сентябрь ва октябрь ойларида мамлакатдаги уруш орқали босиб олинган тоғли ҳудудларда ёнғин чиқарганини тан олгани айтилмоқда. Мазкур ёнғинлар оқибатида уч киши ҳалок бўлган.
Маҳаллий ҳукумат Латакия, Тартус, Хомс ва Хама провинцияларини қамраб олган жами 187 та ўрмон ёнғинларини қайд этган бўлиб, у 280 та шаҳар ва қишлоқларга шикаст етказган. Ёнғинлар қишлоқ хўжалиги учун яроқли 13 минг гектар ер ва 11 минг гектар ўрмонни кулга айлантирган.
Эслатиб ўтамиз, 2019 йилнинг октябрида Сурияда кучли ўрмон ёнғинлари кузатилган эди. Ўшанда ўрмонлар ёнғинининг асосий ўчоқлари мамлакат шимоли-ғарбидаги Ҳомсе, Тартус ва Латакия вилоятларида экани қайд этилган. Ўрмонлар ёнишини ўчириш учун у ерга жанубий провинция ўт ўчирувчилари юборилган. Тартус вилоятининг ўзида ёнғиннинг 55 ўчоғи борлиги аниқланган ва уларнинг ҳаммаси аҳоли яшовчи ҳудудлардан узоқда жойлашган.
Изоҳ (0)