Kobul yaqinida sodir bo‘lgan portlash oqibatida Afg‘oniston poytaxti va unga yondosh viloyatlar elektr energiyasisiz qoldi. Portlashga aynan nima sabab bo‘lgani hozircha noma’lum, deb xabar beradi “Kommersant”.
Afg‘on energetika korporatsiyasining ma’lum qilishicha, portlash Qal’a Murad Beg tumanida sodir bo‘lgan, ko‘ngilsiz hodisa oqibatida elektr uzatish tarmog‘iga shikast yetgan. Kompaniya favqulodda holat sodir bo‘lgan joyga o‘z muhandislarini yuborgan bo‘lib, ular “vaziyat taqazo etishi” bilan ishga kirishadi.
Kobulda elektr energiyasi 21-oktabr kuni Toshkent vaqti bilan soat 20:00 da o‘chgan. Afg‘oniston poytaxtida 4,5 millionga yaqin odam istiqomat qiladi. Korxonalar va yaxshi ta’minlangan oilalarning uylarida shaxsiy elektrogeneratorlar ishlamoqda.
So‘nggi bir oy ichida mamlakatda ikkinchi bor elektr energiyasi uzilmoqda. O‘tgan safar Kobul 13-oktabr kuni elektrsiz qolgan edi, o‘shanda bunga “texnik muammolar” sabab bo‘lgan. The Wall Street Journal “Tolibon” tomonidan tuzilgan yangi afg‘on hukumati elektr energiya yetkazib beruvchilarga pul to‘lamayotgani haqida yozgandi.
Izoh (0)