Shavkat Mirziyoyev 22-oktabr kuni O‘zbekiston prezidentligiga nomzod sifatida YXHT Demokratik institutlar va inson huquqlari bo‘yicha byurosining (DIIHB)ning mamlakatdagi prezident saylovini kuzatish bo‘yicha missiyasi rahbari Ouen Merfi bilan uchrashdi.
Prezident matbuot xizmatining ma’lum qilishicha, byuro Yevropada xavfsizlik va hamkorlik tashkilotining yetakchi institutlaridan biri bo‘lib, uning faoliyati insonning asosiy huquq va erkinliklariga rioya etilishini ta’minlash, demokratik institutlar va fuqarolik jamiyatini mustahkamlashga ko‘maklashish masalalarini qamrab oladi.
DIIHB respublikada prezident va parlament saylovlarini kuzatishda 1999-yildan buyon ishtirok etib kelmoqda. 2016-yil dekabr oyida byuro ilk bor O‘zbekistonga davlat rahbari saylovini kuzatish uchun o‘zining to‘laqonli missiyasini yo‘lladi.
Bu galgi prezident saylovini kuzatish uchun ham xuddi shunday delegatsiya O‘zbekistonga keldi. Ushbu birlashgan xalqaro missiya tarkibiga byurodan, YXHT Parlament assambleyasidan va Yevroparlamentdan kuzatuvchilar kirgan.
Uchrashuvda demokratik yangilanishlarni amalga oshirish, saylov qonunchiligi va saylov jarayonlarini takomillashtirish, shuningdek, bo‘lajak muhim siyosiy tadbirni xalqaro norma va standartlarga muvofiq tayyorlash va o‘tkazish masalalari yuzasidan fikr almashilgan.
Shuningdek, tadbirkorlar va ishbilarmonlar harakati — O‘zbekiston Liberal-demokratik partiyasidan prezidentlikka nomzodning saylovoldi platformasidagi ustuvor yo‘nalishlar ham ko‘rib chiqilgan.
Eslatib o‘tamiz, O‘zbekistonda prezident saylovi 24-oktabr, yakshanba kuni bo‘lib o‘tadi. Unda Ekologik partiyadan Narzullo Oblomurodov, Xalq demokratik partiyasidan Maqsuda Vorisova, Liberal-demokratik partiyadan Shavkat Mirziyoyev, “Milliy tiklanish” demokratik partiyasidan Alisher Qodirov va “Adolat” sotsial-demokratik partiyasidan Bahrom Abduhalimov nomzod sifatida ishtirok etadi.
Izoh (0)