Шавкат Мирзиёев 22 октябрь куни Ўзбекистон президентлигига номзод сифатида ЕХҲТ Демократик институтлар ва инсон ҳуқуқлари бўйича бюросининг (ДИИҲБ)нинг мамлакатдаги президент сайловини кузатиш бўйича миссияси раҳбари Оуэн Мерфи билан учрашди.
Президент матбуот хизматининг маълум қилишича, бюро Европада хавфсизлик ва ҳамкорлик ташкилотининг етакчи институтларидан бири бўлиб, унинг фаолияти инсоннинг асосий ҳуқуқ ва эркинликларига риоя этилишини таъминлаш, демократик институтлар ва фуқаролик жамиятини мустаҳкамлашга кўмаклашиш масалаларини қамраб олади.
ДИИҲБ республикада президент ва парламент сайловларини кузатишда 1999 йилдан буён иштирок этиб келмоқда. 2016 йил декабрь ойида бюро илк бор Ўзбекистонга давлат раҳбари сайловини кузатиш учун ўзининг тўлақонли миссиясини йўллади.
Бу галги президент сайловини кузатиш учун ҳам худди шундай делегация Ўзбекистонга келди. Ушбу бирлашган халқаро миссия таркибига бюродан, ЕХҲТ Парламент ассамблеясидан ва Европарламентдан кузатувчилар кирган.
Учрашувда демократик янгиланишларни амалга ошириш, сайлов қонунчилиги ва сайлов жараёнларини такомиллаштириш, шунингдек, бўлажак муҳим сиёсий тадбирни халқаро норма ва стандартларга мувофиқ тайёрлаш ва ўтказиш масалалари юзасидан фикр алмашилган.
Шунингдек, тадбиркорлар ва ишбилармонлар ҳаракати — Ўзбекистон Либерал-демократик партиясидан президентликка номзоднинг сайловолди платформасидаги устувор йўналишлар ҳам кўриб чиқилган.
Эслатиб ўтамиз, Ўзбекистонда президент сайлови 24 октябрь, якшанба куни бўлиб ўтади. Унда Экологик партиядан Нарзулло Обломуродов, Халқ демократик партиясидан Мақсуда Ворисова, Либерал-демократик партиядан Шавкат Мирзиёев, «Миллий тикланиш» демократик партиясидан Алишер Қодиров ва «Адолат» социал-демократик партиясидан Баҳром Абдуҳалимов номзод сифатида иштирок этади.
Изоҳ (0)