Namanganning To‘raqo‘rg‘on tumanida 46 yoshli ayol Gentra urib ketishi oqibatida vafot etdi. Bu haqda viloyat IIB matbuot xizmati xabar berdi.
Voqea 13-oktabr kuni soat 18:30 larda To‘raqo‘rg‘on—Mirishkor yo‘lining 5 kilometrida, To‘raqo‘rg‘on tumani Bekobod MFY hududida yuz bergan. 18 yoshli fuqaro o‘ziga biriktirilgan Gentra’ni boshqarib borayotib, harakat xavfsizligini ta’minlay olmay, yo‘lni kesib o‘tayotgan ayolni urib yuborgan. Oqibatda piyoda olgan tan jarohati tufayli shifoxonada vafot etgan.
Ushbu holat yuzasidan To‘raqo‘rg‘on tuman IIB huzuridagi TB tomonidan 13-oktabr kuni Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilgan.
Eslatib o‘tamiz, 11-oktabr kuni Namangan shahrida Nexia urib ketishi oqibatida yo‘l chetida turgan piyoda, undan bir kun avval esa “Moskvich” urib ketishi oqibatida velosipedchi vafot etgandi. Shu kuni 14 yoshli bola otasining Nexia’sini haydab ketib, Matiz bilan to‘qnashishi oqibatida bir kishining umriga zomin bo‘lgandi.
Izoh (0)