Shimoliy Atlantika alyansi (NATO) Xitoy tomonidan o‘z armiyasini “intensiv” modernizatsiya qilish borasida olib borayotgan harakatlariga javob chorasini ko‘radi. Bu haqda NATO bosh kotibi Yens Stoltenbergga tayanib, “Kommersant” xabar berdi. Uning so‘zlariga ko‘ra, Pekin yadroviy va kibernetika sohalarida imkoniyatlarini oshirmoqda.
Stoltenberg Bryusselda alyansga a’zo mamlakatlarning mudofaa vazirlari ishtirokida o‘tkazilgan birinchi yig‘ilish yakunlari bo‘yicha tashkil etilgan matbuot anjumanida chiqish qildi. NATO bosh kotibining aytishicha, dunyodagi kuchlar muvozanati “Xitoyning ko‘tarilishi natijasida aralashib ketadi”. U Xitoyni dunyo tinchligiga yangi xavf qatoriga kiritgan.
“Xitoy yadroviy va kibernetika imkoniyatlarini o‘zlashtirish orqali intensiv ravishda o‘zining harbiy salohiyatini modernizatsiya qilmoqda. Xitoy ilg‘or yadroviy tizimlar va uzoq masofaga uchuvchi raketalarni rivojlantirmoqda. Xitoy bizga tobora yaqinlashayotganini ko‘rmoqdamiz… Ittifoqdoshlarimiz bilan ko‘p narsani qilishga kelishib olganimiz — bu, xususan, Xitoyning harakatlariga javobdir”, — deydi u.
Yens Stoltenbergning so‘zlariga ko‘ra, NATOga a’zo davlatlar sun’iy intellekt strategiyasi, shuningdek, qurollanish tizimida ancha ilg‘or texnologiyalarni yaratish bo‘yicha kelishib olgan.
Sentabr oyida NATO bosh kotibi Xitoy va Rossiyani yadroviy potensiallarini faol rivojlantirishda ayblagan edi. Bunga javoban Xitoy hukumati alyansga norozilik bildirib, Pekin “yadroviy qurilmalarini minimal zarur darajada ushlab turganini” ta’kidlagan.
Avvalroq NATO harbiy qo‘mitasi raisi Styuart Pich Xitoy harbiy modernizatsiyasining “hayratda qoldiradigan” tezligi haqida ogohlantirgandi. Pichning ta’kidlashicha, NATOning barcha a’zolari vaziyatni tahlil qilib, ittifoq uchun Xitoyning harbiy ambitsiyalari nimani anglatishini hal qilishi zarur.
Izoh (0)