Si Szinpin Xitoy armiyasini takomillashtirish zarurligini aytdi

Xitoy Xalq Respublikasi (XXR) hukumati Xitoy Xalq ozodlik armiyasini (XXOA) shunday takomillashtirishi kerakki, toki u mamlakat milliy manfaatlarini, shuningdek, suvereniteti va xavfsizligini himoyalashga qodir bo‘lsin. Bu haqda XXR rahbari Si Szinpin Xitoy Kommunistik partiyasining 100 yilligi munosabati bilan so‘zlagan nutqida aytib o‘tdi.

“XXOA mamlakat suvereniteti, xavfsizligi va taraqqiyot manfaatlarini ishonchli himoya qilishi uchun yanada yuqori imkoniyatlarga ega bo‘lgan jahon standartlariga mos qurolli kuchga aylanishi kerak”, — dedi XXR rahbari.

Si Szinpin “kuchli mamlakat kuchli armiyaga ega bo‘lishi zarur” deya qo‘shimcha qildi. Uning fikriga ko‘ra, faqat kuchli armiyagina mamlakat xavfsizligini ta’minlashga qodir.

Avvalroq NATO harbiy qo‘mitasi raisi Styuart Pich Xitoy harbiy modernizatsiyasining “hayratda qoldiradigan” tezligi haqida ogohlantirgandi.

“Xitoy o‘z kemalarini qanchalik tez qurgani, qisqa muddatda havo kuchlarini modernizatsiya qilgani, kibernetika va axborot boshqaruvining boshqa shakllariga qancha mablag‘ kiritgani hayratga soladi”, — dedi Pich.

Pichning ta’kidlashicha, NATOning barcha a’zolari vaziyatni tahlil qilib, ittifoq uchun Xitoyning harbiy ambitsiyalari nimani anglatishini hal qilishi zarur.