Шимолий Атлантика альянси (НАТО) Хитой томонидан ўз армиясини «интенсив» модернизация қилиш борасида олиб бораётган ҳаракатларига жавоб чорасини кўради. Бу ҳақда НАТО бош котиби Йенс Столтенбергга таяниб, «Коммерсантъ» хабар берди. Унинг сўзларига кўра, Пекин ядровий ва кибернетика соҳаларида имкониятларини оширмоқда.
Столтенберг Брюсселда альянсга аъзо мамлакатларнинг мудофаа вазирлари иштирокида ўтказилган биринчи йиғилиш якунлари бўйича ташкил этилган матбуот анжуманида чиқиш қилди. НАТО бош котибининг айтишича, дунёдаги кучлар мувозанати «Хитойнинг кўтарилиши натижасида аралашиб кетади». У Хитойни дунё тинчлигига янги хавф қаторига киритган.
«Хитой ядровий ва кибернетика имкониятларини ўзлаштириш орқали интенсив равишда ўзининг ҳарбий салоҳиятини модернизация қилмоқда. Хитой илғор ядровий тизимлар ва узоқ масофага учувчи ракеталарни ривожлантирмоқда. Хитой бизга тобора яқинлашаётганини кўрмоқдамиз… Иттифоқдошларимиз билан кўп нарсани қилишга келишиб олганимиз — бу, хусусан, Хитойнинг ҳаракатларига жавобдир», — дейди у.
Йенс Столтенбергнинг сўзларига кўра, НАТОга аъзо давлатлар сунъий интеллект стратегияси, шунингдек, қуролланиш тизимида анча илғор технологияларни яратиш бўйича келишиб олган.
Сентябрь ойида НАТО бош котиби Хитой ва Россияни ядровий потенциалларини фаол ривожлантиришда айблаган эди. Бунга жавобан Хитой ҳукумати альянсга норозилик билдириб, Пекин «ядровий қурилмаларини минимал зарур даражада ушлаб турганини» таъкидлаган.
Аввалроқ НАТО ҳарбий қўмитаси раиси Стюарт Пич Хитой ҳарбий модернизациясининг «ҳайратда қолдирадиган» тезлиги ҳақида огоҳлантирганди. Пичнинг таъкидлашича, НАТОнинг барча аъзолари вазиятни таҳлил қилиб, иттифоқ учун Хитойнинг ҳарбий амбициялари нимани англатишини ҳал қилиши зарур.
Изоҳ (0)