Turkiyaning Istanbul shahrida 22-oktabr, juma kuni Turkiy tilli davlatlar hamkorlik kengashiga a’zo mamlakatlar vakillari ishtirokida “Ildizlari mushtarak tarix, kuchli kelajak” shiori ostida media-forum boshlandi.
Forumda Ozarbayjon, Turkiya, O‘zbekiston, Qozog‘iston, Qirg‘iziston, Turkmaniston, Shimoliy Kipr va Vengriyadan 500 ga yaqin axborot sohasi rasmiylari, tilshunos olimlar, diplomatik korpus va davlat idoralarining yuqori martabali mutasaddilari, jurnalistlar, talabalar qatnashmoqda.
24-oktabrga qadar davom etadigan forum doirasida turli jabhalardagi aloqalarni mustahkamlashga qaratilgan dolzarb mavzular bo‘yicha muloqot sessiyalari tashkil etiladi. Xususan, kinosanoati va OAV sohasini rivojlantirish, dezinformatsiya va yolg‘on axborotga qarshi kurashish bo‘yicha hamkorlik masalalari muhokama qilinishi ko‘zda tutilgan.
Forum ishtirokchilariga videomurojaat yo‘llagan Turkiya prezidenti Rajab Toyyib Erdo‘g‘on turkiy dunyoda birdamlik, hamjihatlik va o‘zaro ishonchni mustahkamlash muhimligini ta’kidlab, mazkur forum bu borada tajriba almashish va imkoniyatlardan samarali foydalanish uchun o‘ziga xos platforma bo‘lishini qayd etdi.
Forum ochilishidan so‘ng Turkiy kengashga a’zo mamlakatlar mustaqilligining 30 yilligiga bag‘ishlangan Raqamli ko‘rgazmaning taqdimot marosimi o‘tkazildi.
Eslatib o‘tamiz, bundan bir necha yil avval Toshkentda Turkiy tilli davlatlarning birinchi Investitsiya va biznes forumi o‘tkazilgandi.
Izoh (0)