Toshkentda 2021-yilning yanvar—sentabr oylari davomida 11 196 ta jinoyat sodir etildi. Poytaxt hokimligi matbuot xizmatining xabar berishicha, bu haqda Xalq deputatlari Toshkent shahar Kengashining 48-sessiyasida ma’lum qilindi.
Qayd etilishicha, ularning 4318 tasi IIBB tomonidan o‘tkazilgan tezkor-profilaktik tadbirlar natijasida aniqlandi. Jami jinoyatlarning fosh etilishi 89,3 foizni tashkil etadi.
Mutasaddilarning ta’kidlashicha, 2021-yilning o‘tgan 9 oyi mobaynida jinoyatchilikning oldini olish, huquqbuzarliklar profilaktikasi, jamoat tartibini saqlash va xavfsizlikni ta’minlash borasida mutasaddi idora va tashkilotlar hamda jamoatchilik bilan hamkorlikda keng qamrovli profilaktik chora-tadbirlar amalga oshirildi. Ammo shunga qaramasdan qonunbuzilish holatlari ko‘paymoqda. Avvalo, firibgarlik jinoyatlari ortmoqda.
Shundan kelib chiqib, har bir tumanda “jinoyat o‘chog‘i”ga aylangan og‘ir mahallalar tanlab olinib, qo‘shimcha kuch va vositalar ajratildi. Shuningdek, profilaktika inspektorlarining 1143 dona elektron planshetiga “E-ma’muriy ish” mobil ilovasi o‘rnatilib, ma’muriy huquqbuzarliklar bo‘yicha ish yuritish elektron tartibga o‘tkazildi va onlayn sudlar yo‘lga qo‘yildi.
Sudlarga yuridik va jismoniy shaxslardan jami 9166 ta murojaat kelib tushgan bo‘lib, bu ko‘rsatkich 2020-yilning shu davriga nisbatan 5055 taga ko‘p. Virtual va xalq qabulxonalari tomonidan yuborilgan 4189 ta murojaatdan 4050 tasi ko‘rib chiqilib, muammoni hal etish choralari ko‘rildi.
Avvalroq korrupsiyaga qarshi kurashish Toshkent shahar Kengashi ta’sis etilgani haqida xabar berilgan edi.
Izoh (0)