O‘zbekistondagi ayrim mahalla xodimlarining maoshi 35 foizga oshiriladi

Prezident Shavkat Mirziyoyev 18-oktabr kuni “Fuqarolarning o‘zini o‘zi boshqarish organlari xodimlarini ijtimoiy qo‘llab-quvvatlashga doir qo‘shimcha chora-tadbirlar to‘g‘risida”gi farmonni imzoladi, deb xabar beradi O‘zA.

Hujjatga ko‘ra, 2021-yil 1-noyabrdan boshlab hududida xonadonlar soni mingta va undan ortiq bo‘lgan fuqarolarning o‘zini o‘zi boshqarish organlari xodimlarining oylik lavozim maoshlarini 35 foizga oshiriladi. Fuqarolarning o‘zini o‘zi boshqarish organlarini saqlash bilan bog‘liq xarajatlar tegishli mahalliy budjet mablag‘lari hisobidan moliyalashtiriladi.

Shuningdek, farmon bilan fuqarolarning o‘zini o‘zi boshqarish organlari xodimlarini rag‘batlantirish, ularga buxgalteriya xizmatini ko‘rsatish vazifasini tuman (shahar) hokimliklaridan tuman (shahar) mahalla va oilani qo‘llab-quvvatlash bo‘limlariga o‘tkaziladi.

Quyidagilar Fuqarolarning o‘zini o‘zi boshqarish organlari xodimlarini rag‘batlantirish jamg‘armasi mablag‘larini shakllantirishning asosiy manbalari etib belgilangan:

• fuqarolar o‘zini o‘zi boshqarish organlarining yillik mehnatga haq to‘lash jamg‘armasining (moddiy rag‘batlantirish maxsus jamg‘armasi mablag‘larini inobatga olmagan holda) 10 foizi miqdoridagi byudjet mablag‘lari;
• xalq deputatlari tuman (shahar) Kengashlari qarorlariga asosan ajratiladigan mahalliy byudjetlar qo‘shimcha manbalarining 3 foizi miqdoridagi ajratma;
• fuqarolarning o‘zini o‘zi boshqarish organlarining mol-mulkini belgilangan tartibda ijaraga berishdan olingan mablag‘lar;
• homiylik mablag‘lari va qonunchilik hujjatlari bilan taqiqlanmagan boshqa manbalar.

Moliya vazirligi 2021-yilda barcha mahalla fuqarolar yig‘inlariga zarur kanselyariya tovarlari xaridi uchun 9,2 milliard so‘m mablag‘ ajratadi hamda 2022-yildan boshlab ushbu maqsadlar uchun zarur mablag‘lar Davlat budjeti parametrlarida ko‘zda tutilishi kerak.

Eslatib o‘tamiz, Shavkat Mirziyoyev 2021-yil yanvardagi yig‘ilishda mahalla raislari va mazkur tizimda ishtirok etadigan barcha xodimlar Davlat boshqaruvi akademiyasida o‘qitilishini ma’lum qilgandi.