Тошкентда 2021 йилнинг январь—сентябрь ойлари давомида 11 196 та жиноят содир этилди. Пойтахт ҳокимлиги матбуот хизматининг хабар беришича, бу ҳақда Халқ депутатлари Тошкент шаҳар Кенгашининг 48-сессиясида маълум қилинди.
Қайд этилишича, уларнинг 4318 таси ИИББ томонидан ўтказилган тезкор-профилактик тадбирлар натижасида аниқланди. Жами жиноятларнинг фош этилиши 89,3 фоизни ташкил этади.
Мутасаддиларнинг таъкидлашича, 2021 йилнинг ўтган 9 ойи мобайнида жиноятчиликнинг олдини олиш, ҳуқуқбузарликлар профилактикаси, жамоат тартибини сақлаш ва хавфсизликни таъминлаш борасида мутасадди идора ва ташкилотлар ҳамда жамоатчилик билан ҳамкорликда кенг қамровли профилактик чора-тадбирлар амалга оширилди. Аммо шунга қарамасдан қонунбузилиш ҳолатлари кўпаймоқда. Аввало, фирибгарлик жиноятлари ортмоқда.
Шундан келиб чиқиб, ҳар бир туманда «жиноят ўчоғи»га айланган оғир маҳаллалар танлаб олиниб, қўшимча куч ва воситалар ажратилди. Шунингдек, профилактика инспекторларининг 1143 дона электрон планшетига «Э-маъмурий иш» мобил иловаси ўрнатилиб, маъмурий ҳуқуқбузарликлар бўйича иш юритиш электрон тартибга ўтказилди ва онлайн судлар йўлга қўйилди.
Судларга юридик ва жисмоний шахслардан жами 9166 та мурожаат келиб тушган бўлиб, бу кўрсаткич 2020 йилнинг шу даврига нисбатан 5055 тага кўп. Виртуал ва халқ қабулхоналари томонидан юборилган 4189 та мурожаатдан 4050 таси кўриб чиқилиб, муаммони ҳал этиш чоралари кўрилди.
Аввалроқ коррупцияга қарши курашиш Тошкент шаҳар Кенгаши таъсис этилгани ҳақида хабар берилган эди.
Изоҳ (0)