Shavkat Mirziyoyev poytaxt saylovchilari bilan uchrashuvda Toshkent havosidagi chang miqdori belgilangan me’yorlardan 2 barobar ko‘pligini ma’lum qildi. Bu haqda “Daryo” muxbiri xabar qildi.
Prezident ko‘p qavatli uylar orasida qurilishni cheklash va qurilish maydonlarida changni bostiruvchi zamonaviy usullar va texnologiyalarni joriy qilish zaruriyati haqida ham gapirdi.
“Toshkent shahrida mavjud ko‘p qavatli uy-joylar orasidagi bo‘sh yerlarda har qanday qurilishlar qilishga chek qo‘yiladi.
Ko‘p qavatli uy-joylarga tutash hududlar faqatgina ushbu uy mulkdorlariga doimiy foydalanish uchun biriktiriladi.
Umuman, kelgusi besh yilda poytaxt aholisi uchun 100 ming xonadonli ko‘p qavatli, energiya tejamkor uylar quriladi.
Uy-joyga muhtoj oilalar uchun 14 trillion so‘mdan ortiq ipoteka kreditlari ajratilib, dastlabki badal va foiz to‘lovlarini qoplash uchun 5 ming nafar oilaga subsidiya beriladi. Ularning xohishiga qarab, ikkilamchi bozordan uylarni sotib olishlariga ham ruxsat beriladi.
Bir masalaga e’tibor bering, Toshkentda havoda chang miqdori belgilangan me’yorlardan 2 barobar ko‘p. Shu bois qurilish maydonlarida changni bostiruvchi zamonaviy usullar va texnologiyalar keng joriy qilinishi shart va zarur bo‘ladi”, – deydi Shavkat Mirziyoyev.
Mavzuga doir:
- Shavkat Mirziyoyev: “Eng katta muammo — Afg‘oniston shu qishni eson-omon, ocharchilikka duch kelmay, urushlarsiz o‘tkazib olishi”
- Toshkentdagi har bir mahallaga 10 mlrd so‘mdan ajratiladi — Shavkat Mirziyoyev
- Farzandini xususiy bog‘cha va maktablarga berganlarga soliq imtiyozi beriladi — Shavkat Mirziyoyev
Izoh (0)