AQSh sobiq prezidenti Bill Klinton bir necha kun avval qonga infeksiya tushishi tashxisi bilan o‘zi yotqizilgan kasalxonadan chiqarildi. Bu haqda uning vakili Klinton davolangan tibbiyot markazi rahbariyatiga tayanib Twitter’da xabar berdi.
“(Sobiq) prezident Klinton bugun UC Irvine tibbiyot markazidan chiqarildi. Tana harorati va qondagi leykotsitlar miqdori normallashdi, bugun u o‘zining Nyu-Yorkdagi uyiga qaytadi, antibiotiklar kursini uyida oxirigacha yetkazadi”, — deyiladi xabarda.
Amaldagi AQSh prezidenti Jo Bayden 15-oktabr kuni Klinton o‘zini yaxshi his qilayotganini bildirgandi. “Bilaman, prezident Klinton haqida savollaringiz bor. Biz qo‘ng‘iroqlashdik. Ahvoli yaxshiga o‘xshaydi”, — degan edi Bayden shu gaplardan keyin stolni taqillatib. Ertasi kuni sobiq prezidentning vakili uning ahvoli yaxshilanganini ma’lum qildi.
12-oktabr kuni Klinton infeksiya tufayli Kaliforniyadagi tibbiy muassasaga olib ketilgan, ammo kasallik COVID-19 bilan bog‘liq emasligi aytilgandi. Uning kasalxonaga yotishiga qonga infeksiya tushishi (sepsis) sabab bo‘lgan. U antibiotiklar bilan davolanayotgani, dorilar unga ijobiy ta’sir qilayotgani ma’lum qilingandi.
Bill Klinton — AQShning 42-prezidenti, uning nomzodi Demokratlar partiyasidan ko‘rsatilgan. U 1993-yildan 2001-yilgacha ketma-ket ikki muddat davlat rahbari bo‘lib ishlagan. Bungacha u besh marta Arkanzas shtati gubernatori etib saylangandi. Siyosatchi bundan oldin ikki marta — 2004 va 2010-yillarda yurak operatsiyasini boshdan o‘tkazgan.
Mavzuga doir:
- Bush, Obama va Klinton jamoatchilik oldida koronavirusga qarshi vaksina bilan emlanishga tayyorligini bildirdi
- Obama va Klintonning sobiq maslahatchisi o‘z joniga qasd qildi
- Klinton va Obamalarga bomba solingan yo‘llanmalar yuborildi
- Bill Klinton Myanmada qo‘lga olingan Reuters jurnalistlarini ozod qilishni talab qildi
- Bill va Hillari Klintonning uyida yong‘in sodir bo‘ldi
Izoh (0)