AQSh sobiq prezidenti Bill Klinton kasalxonaga yotqizildi, deb xabar bermoqda CNN. Telekanal ma’lumotlariga ko‘ra, Klinton infeksiya tufayli Kaliforniyadagi tibbiy muassasaga olib ketilgan, ammo kasallik COVID-19 bilan bog‘liq emas.

Bill Klinton

Foto: Reuters

Klintonning rasmiy vakili aytishicha, 75 yoshli siyosatchining ahvoli yaxshilanmoqda, kayfiyati ham yaxshi. CNN aniqlik kiritishicha, kasalxonaga yotishiga qonga infeksiya tushishi (sepsis) sabab bo‘lgan. Klinton 12-oktabr, seshanba kuni sog‘lig‘i yomonlashgani sababli kasalxonaga olib ketilgan.

“U antibiotiklar bilan davolanmoqda, shifokorlarning aytishicha, dorilar unga ijobiy ta’sir qilmoqda” — deyiladi xabarda.

Telekanal jurnalistlari, davolovchi shifokorlar va sobiq prezidentning vakillariga tayanib, Klintonga 16-oktabr kuni uyga javob berilishi mumkinligi haqida xabar qildi. Siyosatchi bundan oldin ikki marta — 2004 va 2010-yillarda yurak operatsiyasini boshdan o‘tkazgan.

Bill Klinton —  AQShning 42-prezidenti, uning nomzodi Demokratlar partiyasidan ko‘rsatilgan. U 1993-yildan 2001-yilgacha ketma-ket ikki muddat davlat rahbari bo‘lib ishlagan. Bungacha u besh marta Arkanzas shtati gubernatori etib saylangandi.

Klintonning rafiqasi Xillari 2009-yildan 2013-yilgacha AQSh Davlat kotibi bo‘lgan. 2016-yilda u  Demokratik partiyadan prezidentlik saylovlarida qatnashdi, lekin respublikachi Donald Trampga yutqazdi.