AQShning sobiq prezidentlari Barak Obama, Jorj Bush va Bill Klinton kamera qarshisida koronavirusga qarshi vaksina bilan emlanib, jamoatchilikning xavfsizlikka bo‘lgan ishonchini oshirishga tayyorligini bildirdi. Buni AQSh oziq-ovqatlar va dorilar sifati ustidan sanitar nazorat boshqarmasi (FDA) vaksinadan foydalanishga ruxsat berganidan so‘ng amalga oshirish mumkin, deb xabar beradi CNN.

Foto: Getty Images

Bush administratsiyasining rahbari Freddi Fordning so‘zlariga ko‘ra, 43-prezident Allergiya va infeksion kasalliklar Milliy instituti direktori Entoni Fauchi va Oq uyning koronavirus bo‘yicha koordinatori Debora Birksga murojaat qilib, vaksinaning targ‘ibotida qanday qilib yordam ko‘rsata olishi mumkinligini so‘ragan.

“Bir necha hafta oldin prezident Bush doktor Fauchi va Birksga vaqti kelganida u vatandoshlariga emlashda yordam berish uchun hamma narsani qilishga tayyorligini yetkazishimni so‘radi. Birinchidan, vaksinalar xavfsiz bo‘lishi va aholining alohida guruhlariga qilinishi kerak. Shundan so‘ng prezident Bush vaksina uchun navbatga turib, uni xursandchilik bilan kamera qarshisida olishga tayyor”, — deydi Ford.

Klintonning matbuot kotibi Anxel Uren esa sobiq prezident ham jamoatchilik ko‘z o‘ngida vaksinani qabul qilishga tayyorligini bildirgan.

Barak Obama esa SiriusXM radiosiga bergan intervyusida emlashdan o‘tish rejalari haqida o‘zi so‘zlab bergan. “Men o‘zim ishlagan va bilgan Entoni Fauchi kabi insonlarga to‘liq ishonaman. Agarda Fauchi menga vaksina xavfsiz va koronavirusga qarshi emlanish mumkin desa, men shubhasiz, bu ishni qilaman”, — deydi sobiq prezident.

Avvalroq Pfizer va BioNTech o‘zining BNT1622b vaksinasi tadqiqotlarning uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Taqqoslash uchun: Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerika Moderna kompaniyasi vaksinasi 94,1 foizga, AstraZeneca kompaniyasi vaksinasi 70 foizga baholangan.

Pfizer va BioNTech vaksinani AQShda hamda Yevroittifoqda ro‘yxatdan o‘tkazish uchun ariza bergan.