АҚШ собиқ президенти Билл Клинтон бир неча кун аввал қонга инфекция тушиши ташхиси билан ўзи ётқизилган касалхонадан чиқарилди. Бу ҳақда унинг вакили Клинтон даволанган тиббиёт маркази раҳбариятига таяниб Twitter’да хабар берди.
«(Собиқ) президент Клинтон бугун UC Irvine тиббиёт марказидан чиқарилди. Тана ҳарорати ва қондаги лейкоцитлар миқдори нормаллашди, бугун у ўзининг Нью-Йоркдаги уйига қайтади, антибиотиклар курсини уйида охиригача етказади», — дейилади хабарда.
Амалдаги АҚШ президенти Жо Байден 15 октябрь куни Клинтон ўзини яхши ҳис қилаётганини билдирганди. «Биламан, президент Клинтон ҳақида саволларингиз бор. Биз қўнғироқлашдик. Аҳволи яхшига ўхшайди», — деган эди Байден шу гаплардан кейин столни тақиллатиб. Эртаси куни собиқ президентнинг вакили унинг аҳволи яхшиланганини маълум қилди.
12 октябрь куни Клинтон инфекция туфайли Калифорниядаги тиббий муассасага олиб кетилган, аммо касаллик COVID-19 билан боғлиқ эмаслиги айтилганди. Унинг касалхонага ётишига қонга инфекция тушиши (сепсис) сабаб бўлган. У антибиотиклар билан даволанаётгани, дорилар унга ижобий таъсир қилаётгани маълум қилинганди.
Билл Клинтон — АҚШнинг 42-президенти, унинг номзоди Демократлар партиясидан кўрсатилган. У 1993 йилдан 2001 йилгача кетма-кет икки муддат давлат раҳбари бўлиб ишлаган. Бунгача у беш марта Арканзас штати губернатори этиб сайланганди. Сиёсатчи бундан олдин икки марта — 2004 ва 2010 йилларда юрак операциясини бошдан ўтказган.
Мавзуга доир:
- Буш, Обама ва Клинтон жамоатчилик олдида коронавирусга қарши вакцина билан эмланишга тайёрлигини билдирди
- Обама ва Клинтоннинг собиқ маслаҳатчиси ўз жонига қасд қилди
- Клинтон ва Обамаларга бомба солинган йўлланмалар юборилди
- Билл Клинтон Мьянмада қўлга олинган Reuters журналистларини озод қилишни талаб қилди
- Билл ва Ҳиллари Клинтоннинг уйида ёнғин содир бўлди
Изоҳ (0)