15 октябрь куни Афғонистоннинг Қандаҳор шаҳрида жойлашган шиалар масжидида портлаш содир этилди. Ҳодиса қурбонлари сони 62 кишига етди, деб ёзади Daily Sabah нашри.
Bakhtar ахборот агентлиги хабарига кўра, яна камида 70 киши жароҳатланган. Гувоҳларнинг айтишича, терактни тўрт нафар худкуш содир этган. Улардан икки нафари масжиднинг олд тарафидаги дарвоза ёнида ўзини портлатган, яна иккитаси бинога кириб, ичкарида ўзини портлатган.
Бундан ташқари, жума намози бўлгани сабабли одатий равишда масжидда 500 нафаргача одам бўлган. Ҳозирча портлаш учун ҳеч ким жавобгарликни ўз зиммасига олмаган.
Бундан бир ҳафта олдин ҳам Афғонистоннинг Қундуз шаҳридаги шиалар масжидида портлаш юз берганди. Ўшанда Frans-Press агентлиги манбаларга таяниб, камида 50 киши қурбон бўлгани ва 140 киши яраланганини хабар қилди. Aamaj News ҳодисага оид видеоматериаллар, шунингдек, гувоҳларнинг кўрсатмаларига таяниб, портлашда 100 га яқин одам ҳалок бўлгани ҳақида ёзган.
Ундан аввал эса Кобулдаги масжид яқинида портлаш содир бўлган ва бунинг учун жавобгарликни ИШИД ўз зиммасига олган. Бундан ташқари, 6 октябрь куни кечаси Хост вилоятидаги диний мактаб ташқарисида яна бир ҳужум уюштирилган, 1 октябрь куни эса Парвон вилоятининг шимолида терактлар содир этилгани хабар қилинган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)