Johns Hopkins universiteti ma’lumotlariga ko‘ra, dunyoda koronavirusga chalinganlar soni 239 610 747 kishiga yetdi, shularning 4 882 095 nafari vafot etgan. Jahon bo‘yicha qo‘llanilgan vaksinalar esa 6,576 milliard dozani tashkil qilmoqda.
Kasallanganlar soni bo‘yicha AQSh (44,7 million), Hindiston (34 million), Braziliya (21,6 million), Buyuk Britaniya (8,3 million) va Rossiya (7,7 million) eng oldinda bormoqda.
Latviya prezidenti koronavirusga chalindi
Latviya prezidenti Egil Levits koronavirusga topshirgan ekspress-test musbat natija berdi, shu sababli u Estoniya prezidenti Alar Karis bilan uchrashuvni keyinga qoldirdi.13-oktabr kuni Latviya yetakchisi Shvetsiyaga xizmat tashrifidan qaytib kelib, COVID-19 ga ekspress-test topshirgan edi. 14-oktabr kuni esa u PZR-testdan ham o‘tdi. Levits Karis bilan shaxsan bog‘lanib, sammitni kechiktirishni so‘ragan.
Shunga qaramay, Estoniya prezidenti 14-oktabr kuni ishchi tashrif bilan Rigaga keldi. Shu kuni u Seym raisi Inara Murniyetse bilan uchrashdi.
Levits 2021-yil fevralida COVID-19 ga qarshi emlangan edi.
Mavzuga doir: Latviya prezidenti YTHga uchradi
Janubiy Koreya prezidenti COVID-19 ga qarshi qayta emlandi
Koreya Respublikasi prezidenti Mun Chje In va uning rafiqasi Kim Chjon Suk 15-oktabr kuni koronavirusga qarshi vaksinaning buster (kuchaytiruvchi, qo‘shimcha) dozasini oldi.“Sog‘liqni saqlash vazirligi tomonidan qabul qilingan revaksinatsiya to‘g‘risidagi qoidalarga muvofiq, Mun Chje In va Kim Chjon Suk Pfizer kompaniyasi tomonidan ishlab chiqarilgan vaksina dozasi bilan emlandi”, — deyiladi prezident matbuot xizmati xabarida.
Ayni paytga qadar mamlakatda 31,6 million kishi yoki aholining 61,6 foizi to‘liq emlangan. Hukumat ushbu ko‘rsatkichni shu oy oxiridayoq 70 foizgacha ko‘tarish uchun vaksinatsiya sur’atlarini oshirishga urinmoqda.
Braziliya prezidenti koronavirusga qarshi emlanishdan bosh tortdi
Braziliya prezidenti Jair Bolsonaru COVID-19 ga qarshi vaksina bilan emlanmasligini ma’lum qildi. Bungacha esa u emlanadigan “so‘nggi braziliyalik” bo‘lishini aytgan edi.
“Men vaksina olmaslikka qaror qildi. Yangi tadqiqotlarga qarayapman, menda immunizatsiya darajasi shundoq ham juda yuqori bo‘lsa, emlanib nima qilaman? Bu xuddi 2 real pul yutib olish uchun 10 realga lotereya sotib olishdek gap. Bu behuda”, — dedi Bolsonaru.
U, shuningdek, to‘liq emlanganlarga beriladigan va ma’lum bir jamoat joylariga kirish uchun talab qilinadigan sanitar ruxsatnomalarga qat’iyan qarshi chiqadi.
“Men uchun erkinlik hamma narsadan ustun. Agar fuqaro emlanishni istamasa, bu uning huquqi, tamom-vassalom”, — dedi prezident.
Braziliyaning 213 million aholisidan qariyb 100 million to‘liq emlangan, yana 50 million birinchi dozani olgan.
Bolsonaru pandemiya boshidan buyon niqob taqishdan bosh tortib va izolyatsiya choralariga qarshi chiqib keladi. U hech qanday koronavirus uni yiqita olmasligini ko‘p bora takrorlagan va kasallikni “yengil gripp” deb atagan. Ma’lumot uchun, 2020-yil yozida u koronavirus bilan kasallanib o‘tgan.
Mavzuga doir: Braziliya prezidenti emlanganlik sertifikati yo‘qligi uchun Nyu-York restoranlariga kiritilmadi
Putin mutaxassislar zarur deb topganida qayta emlanishini bildirdi
Rossiya prezidenti Vladimir Putinning qayta emlanishi mutaxassislar tavsiyasiga bog‘liq bo‘ladi, ular buni zarur deb topishi bilan, bu jarayondan o‘tadi.“Hammasi mutaxassislar tavsiyalariga bog‘liq bo‘ladi. Bilasiz, prezident bunga juda e’tibor bilan munosabatda bo‘ladi, mutaxassislar qayta emlanish zarur degan xulosaga kelishi bilan, prezident buni amalga oshiradi ”, — dedi matbuot kotibi Dmitriy Peskov.
Putin vaksina olganiga olti oy to‘ldi. Avvalroq uning o‘zi koronavirusga nisbatan antitanalari yuqori bo‘lib qolayotganini aytgandi.
Izoh (0)