Gruziyada hibsda saqlanayotgan mamlakat sobiq prezidenti Mixail Saakashvilining sog‘lig‘i yomonlashdi. Qamoqxonada u ochlik e’lon qilgandi, shu sababli uning oyoqlari shishib ketgan. Bu haqda Gruziya sobiq rahbarining advokati Georgiy Gelxauri 12-oktabr kuni mijozi bilan uchrashgandan keyin jurnalistlarga ma’lum qildi.

Foto: Reuters

“U (Saakashvili) bizga xabar qilgani kabi uning oyoqlari shishib ketgan. Harakatlanishda ham qiyinchilikka duch kelmoqda. Shu sababli, unga shifokor nazorati ostida bo‘lish nihoyatda zarur. Bu holatda men uning shaxsiy shifokorini nazarda tutyapman. Shaxsiy shifokori uning ahvoli haqida bizga ma’lum qilishi kerak. Misha (Saakashvili) shaxsiy shifokori har kuni uning oldiga tashrif buyurishini talab qilmoqda”, — dedi Gelxauri.

Saakashvilining shaxsiy shifokori Nikoloz Kipshidze 10-oktabr kuni sobiq prezidentning sog‘lig‘i yomonlashgani va uni kasalxonaga yotqizish kerakligini aytgandi. Keyinchalik Adliya vazirligining Maxsus jazoni ijro etish xizmati Gruziya sobiq rahbarining ahvoli qoniqarli, hayotiy belgilari normal ekani haqida bayonot tarqatdi.

Avvalroq Saakashvili omma oldida giyohvandlikka test topshirishga tayyorligi, shu orqali u bosh vazir Irakli Garibashvilining Saakashvili giyohvand ekani haqidagi taxminlarini yo‘qqa chiqarmoqchi ekani haqida xabar qilingandi. 6-oktabr kuni Garibashvili Saakashvilining giyohvand moddalarni iste’mol qilishi mumkinligi haqida ochiq maktub e’lon qilgan.

Saakashvili 1-oktabr kuni Tbilisida hibsga olingandi. U hozir Rustavi shahridagi qamoqxonada. Ilgari Gruziyada unga nisbatan to‘rtta jinoiy ish ochilgan, ulardan ikkitasi bo‘yicha 2018-yilda sud hukmi ham o‘qilgan. Saakashvili kelganidan so‘ng Gruziya Ichki ishlar vazirligi unga qarshi chegarani noqonuniy kesib o‘tish bo‘yicha yana bir jinoiy ish ochgan.