14 октябрь куни кечқурун Тбилиси марказидаги Озодлик майдонида 20-30 минг одам тўпланди, у ерда Грузиянинг учинчи президенти Михаил Саакашвилини қамоқдан озод қилиш талаби билан намойиш бўлиб ўтди. Саакашвили 1 октябрь куни Украинадан ватанига қайтгач, ҳибсга олинганди. Собиқ президент Грузия пойтахти яқинидаги Рустави қамоқхонасида. У очлик эълон қилганига ўн кундан ошди.
Грузияда 2003 йилги «атиргул инқилоби» ҳам шу майдонда бошланганди. Мухолифат ҳозирги митинг 30 октябрга белгиланган муниципал сайловларнинг иккинчи босқичи олдидан муҳим воқеа бўлишига умид билдирди.
Тбилиси, Рустави, Батуми, Поти, Кутаиси ва Зугдиди каби бир қанча муҳим шаҳарларда мэр лавозимига сайловларнинг биринчи босқичида Саакашвилининг «Ягона миллий ҳаракат» (ЙМҲ) партиясидан номзодлар иккинчи босқичга йўл олди ва ҳукмрон «Грузия орзуси» партиясидан бўлган номзодларни мағлуб этиш учун ҳақиқий имкониятни сақлаб қолди.
Митингнинг асосий талаби —мансабини суиистеъмол қилгани учун аввалроқ Тбилиси суди томонидан олти йилга озодликдан маҳрум этилган Михаил Саакашвилини озод қилиш. Митинг бошланишидан олдин собиқ президент ўз тарафдорларига мактуб билан мурожаат қилди. Саакашвилининг адвокати Ника Гварамия мактубни шаҳар кенгаши биноси олдидаги саҳнада ўқиб эшиттирди.
Сиёсатчи ўз мурожаатида мамлакат халқини «ёвузлик ва ёлғон карфагени» бўлган ҳозирги ҳукуматга қарши курашиш учун бирлашишга чақирди. «Ҳаммамиз бирлашишимиз керак — мамлакатдагилар, чет элдагилар ҳам, қамоқдаги ва озодликдагилар ҳам. Ҳозир партия ёки бошқа принцип бўйича бўлиниш вақти эмас. Грузияни қутқариш вақти келди ва бугун бунинг учун энг муҳими — бирлик », — деб ёзади Саакашвили.
«Агар тирик ҳолимда ўз мамлакатимга ёрдам бера олмасам, эҳтимол менинг ўлимим унинг йўлини ёритиб беради», — дейилади Саакашвилининг мактубида.
Митингга тайёргарлик пайшанба куни эрталабдан бошланди: мамлакатнинг барча вилоятларидан ЙМҲ тарафдорлари минган автомобиллар карвони пойтахт томон йўл олди. Йўлда уларни Михаил Саакашвилининг мухолифлари кутиб олди. Улар машиналарга қўпол сўзлар ва лаънатлар ёғдиришди, шунингдек, президент Саакашвили даврида Грузия қамоқхоналаридаги «қийноқ амалиётини» эслаб, уларга супурги улоқтиришди.
Мухолифатчиларнинг Тбилиси томон юриши билан бир вақтда Грузия Ички ишлар вазирлигининг махсус кучлари маъмурий биноларни, шу жумладан, давлат канселарияси (бош вазир Иракли Гарибашвилининг идораси жойлашган) ва парламент биносини ўраб олди.
Бироқ ЙМҲ етакчиларидан бири — Кутаиси мэри учун номзод, илгари Украина Миллий полицияси бошлиғи лавозимида ишлаган Хатия Деканоидзе олдиндан журналистларга митинг ниҳоятда тинч бўлишини айтди. Унинг сўзларига кўра, мухолифат маъмурий биноларга бостириб киришни режалаштирмаган.
Митинг тинч ўтди, шу сабаб полиция ҳеч қандай тарзда воқеалар ривожига аралашмади. Митингни олиб бораётган собиқ адлия вазири Ника Гварамиянинг айтишича, мухолифат ҳаракатининг асосий мақсади «Грузияни Россия империяси кишанидан озод қилиш ва Путиннинг шахсий асири — буюк президент Михаил Саакашвилини ҳибсдан чиқариш».
Эслатиб ўтамиз, грузин мухолифати «Грузия орзуси» асосчиси Бидзина Иванишвилининг Россия Федерацияси билан чамбарчас боғлиқлигини мунтазам айтиб келади.
Мавзуга доир:
Изоҳ (0)