Giyohvand moddalar ishlab chiqarish muammosi Afg‘onistonda haligacha dolzarb bo‘lib qolmoqda, mamlakat yangi hukumati uchun bunday faoliyatdan tushgan daromaddan voz kechish oson bo‘lmaydi. Rossiya prezidenti Vladimir Putin shunday fikrda.
“Afg‘onistonda giyohvand moddalar ishlab chiqarish va ularni kontrabanda yo‘li bilan boshqa davlatlarga o‘tkazish muammosi haligacha o‘ta keskin. Afg‘oniston dunyodagi eng yirik afyun ta’minotchisi bo‘lib qolmoqda. Giyohvand moddalar yetishtirishga qarshi kurashishni va’da qilganiga qaramay, “Tolibon” aslida buni uddalayaptimi, o‘zi bu bilan shug‘ullanyaptimi yoki shug‘ullanishni istamayaptimi, menga qorong‘i. Ular avvalgi safar hokimiyatga kelganida, prinsipial jihatdan buni amalga oshirgan va muvaffaqiyatga erishgan. Ammo bugun, ayniqsa, iqtisodiyotdagi inqirozli vaziyatda bunday daromad manbayidan voz kechish oson bo‘lmaydi ”, —dedi Putin 15-oktabr kun bo‘lib o‘tgan Mustaqil Davlatlar Hamdo‘stligi sammitida.
Rossiya prezidenti “Tolibon” bilan muloqot qilish zarur, lekin ularni tan olishga shoshilmaslik kerak, deb hisoblaydi.
“Tolibon’ni rasman tan olishga shoshilishning keragi yo‘q. Biz ular bilan muloqot qilish zarurligini tushunyapmiz, ammo bu borada ham shoshilmaslik kerak”, — dedi Putin.
Avvalroq “Tolibon” Moskvadagi muzokaralarga taklif qilingandi. 20-oktabr kuni Afg‘onistonning yangi hukumati bilan uchrashuv bo‘lib o‘tishi kutilmoqda. Oxirgi marta “Tolibon” delegatsiyasi Rossiyaga iyul oyida hali Afg‘onistonda hokimiyatni qo‘lga olishidan oldin tashrif buyurgan.
Izoh (0)