O‘zbekiston Davlat soliq qo‘mitasi prezidentlikka nomzod Alisher Qodirovning xorijdagi mehnat migrantlarini soliqqa tortish to‘g‘risida bildirgan taklifiga munosabat bildirdi.
DSQ matbuot kotibi Muzaffar Nazarovning “Daryo”ga ma’lum qilishicha, keltirilgan tashabbusni amalga oshirish bo‘yicha hozirda hech qanday takliflar yo‘q.
“O‘zbekiston soliq qonunchiligida muhojirlardan olinadigan daromad solig‘i belgilanmagan. Hozirda bunday taklif yoki buni amalga oshirish bo‘yicha harakatlar yo‘q”, — deydi Muzaffar Nazarov.
Eslatib o‘tamiz, “Milliy tiklanish” demokratik partiyasidan prezidentlikka nomzod Alisher Qodirov Andijon viloyatidagi saylovchilar bilan bo‘lib o‘tgan uchrashuvda migrantlardan ham soliq undirish taklifini bildirgandi.
“Biz hozir pul aylanmasini faqatgina migrantlarning ishlayotgan joyidan oilasiga jo‘natgan puli bo‘yicha hisob-kitob qilib, shuncha pul aylanyapti deyapmiz. Bu ham yaxshi, albatta. Lekin u sizning oilangizga jo‘natilgan pul. Undan soliq to‘lanayotgani yo‘q, u mamlakatning taraqqiyoti uchun ishlatilmayapti. Shuning uchun men yanayam vatanparvarroq bo‘lishni taklif qilgan bo‘lardim, migrantlar ham o‘zining solig‘ini mamlakat taraqqiyoti uchun to‘lasin”, — deydi u.
Mavzuga doir:
- “Prezidentlikka Alisher Qodir…” — Alisher Qodirov saylov kampaniyasini boshladi
- Sergey Lavrov O‘zbekistonda rus maktablarini ochish dasturi tayyorlanayotganini ma’lum qildi. XTV esa o‘zida bunday ma’lumot yo‘qligini bildirdi
- Rossiyada muhojirlar uchun maxsus mobil dastur 2022-yilda ishga tushiriladi
Izoh (0)