“Prezidentlikka Alisher Qodir…” — Alisher Qodirov saylov kampaniyasini boshladi

20-sentabrdan O‘zbekiston Prezidentiligiga nomzodlarning saylovoldi tashviqoti boshlandi. “Gazeta.uz”ning yozishicha, “Milliy tiklanish” partiyasidan prezidentlikka nomzod bo‘lgan Alisher Qodirov o‘z saylov kampaniyasini boshlab yuborgan.

Saylov kodeksiga ko‘ra, saylovoldi tashviqoti nomzodlarni ro‘yxatga olish uchun belgilangan oxirgi kunning ertasidan e’tiboran boshlanadi. Bu kun 19-sentabrga to‘g‘ri kelgan. Shu munosabat bilan, “Milliy tiklanish” partiyasidan prezidentlikka nomzod bo‘lgan Alisher Qodirov o‘z saylov kampaniyasini boshlagan. Nomzodning “Alisher Qodir…” shiori ostidagi bannerlari va e’lon qilingan videorolikni ko‘rish mumkin.

Ijtimoiy tarmoqlarda erta tongdan Alisher Qodirov tasvirlangan banner muhokama qilinmoqda va birinchi qarashda “Prezidentlikka Alisher Qodir” — “Alisher prezidentlikka qodir” kabi o‘qiladigan so‘zlar tasvirlangan. Yaxshilab e’tibor berilsa, to‘liq matn paydo bo‘ladi: “Prezidentlikka nomzod Alisher Qodirov” degan so‘zlarni ko‘rish mumkin.

Shuningdek, bugun, 20-sentabr kuni soat 17:00 da Samarqand shahridagi “Registon” maydonida Alisher Qodirovning ilk mitingi bo‘lib o‘tadi. Iyun oyida bergan intervyusida Alisher Qodirov bo‘lajak saylovlarda partiyaning “muqobil g‘oyasi bo‘lishi”ni aytgan edi. Unda u hamma narsada ham hamfikr emasligini ta’kidlagandi.