Zangiotadagi kovid-kasalxonada 2021-yil boshidan buyon qancha chaqaloq tug‘ilgani ma’lum qilindi

Zangiota tumanidagi 1-sonli yuqumli kasalliklar shifoxonasida 2021-yil boshidan buyon 377 nafar chaqaloq dunyoga keldi. Bu haqda muassasa direktori Anvar Husanov Sog‘liqni saqlash vazirligiga ma’lum qildi.

Uning aytishicha, 15-oktabr holatiga ko‘ra, bu yerda 1350 nafardan ziyod bemor davolanmoqda. Ulardan 39 nafari o‘ta og‘ir, 219 nafari og‘ir, 933 nafari o‘rta og‘ir holatda. Shuningdek, jonlantirish bo‘limlarida 170 nafar bemor shifokor va hamshiralarning doimiy nazorati ostida.

“Bolalar o‘rtasida ham kasallikka chalinish ko‘rsatkichlari, afsuski, hanuz yuqori. Buni muassasada 18 yoshgacha bo‘lgan 167 nafar o‘g‘il-qiz (jami bemorlarning 12,3 foizi) davolanayotgani ham tasdiqlaydi. Ulardan 3 nafari ayni paytda jonlantirish bo‘limida muolaja olmoqda.

Binobarin bemorlar orasida 122 nafar homilador ayol ham mavjud. Kecha bu yerda 2 nafar chaqaloq dunyoga keldi. Natijada yil boshidan buyon Zangiota 1-sonli yuqumli kasalliklar shifoxonasida tug‘ilgan go‘daklar soni 377 nafarga yetdi”, — degan shifoxona direktori.

Ma’lumot uchun, Toshkent viloyati Zangiota tumanidagi 1-sonli maxsus shifoxona va 2-sonli maxsus shifoxona koronavirus bilan kasallangan bemorlarni davolash uchun ketma-ket qurilgan. Muassasa 2 ming o‘ringa mo‘ljallangan. Lekin 4 ming o‘ringacha transformatsiya qilish imkoniyati bor. Kasalxona 2020-yilning 6-iyulidan bemorlarni qabul qila boshlagan va ochilganiga bir hafta bo‘lmasdan koronavirus bemorlariga to‘lgandi.

Sog‘liqni saqlash vazirining 2020-yil dekbaridagi buyrug‘i bilan Zangiota tumanidagi 1-sonli yuqumli kasalliklar shifoxonasi tarkibida koronavirusga chalingan yoki unga gumon qilingan shoshilinch terapevtik yordamga muhtoj bemorlar hamda homiladorlar uchun bo‘lim ochilgan.

Muassasada homilador ayollar uchun 158 o‘rinli tug‘ruq kompleksi bo‘lib, shundan homiladorlar patologiyasi bo‘limi 146 ta, reanimatsiya bo‘limi 12 ta o‘ringa mo‘ljallangan.