Ўзбекистон Давлат солиқ қўмитаси президентликка номзод Алишер Қодировнинг хориждаги меҳнат мигрантларини солиққа тортиш тўғрисида билдирган таклифига муносабат билдирди.
ДСҚ матбуот котиби Музаффар Назаровнинг «Дарё»га маълум қилишича, келтирилган ташаббусни амалга ошириш бўйича ҳозирда ҳеч қандай таклифлар йўқ.
«Ўзбекистон солиқ қонунчилигида муҳожирлардан олинадиган даромад солиғи белгиланмаган. Ҳозирда бундай таклиф ёки буни амалга ошириш бўйича ҳаракатлар йўқ», — дейди Музаффар Назаров.
Эслатиб ўтамиз, «Миллий тикланиш» демократик партиясидан президентликка номзод Алишер Қодиров Андижон вилоятидаги сайловчилар билан бўлиб ўтган учрашувда мигрантлардан ҳам солиқ ундириш таклифини билдирганди.
«Биз ҳозир пул айланмасини фақатгина мигрантларнинг ишлаётган жойидан оиласига жўнатган пули бўйича ҳисоб-китоб қилиб, шунча пул айланяпти деяпмиз. Бу ҳам яхши, албатта. Лекин у сизнинг оилангизга жўнатилган пул. Ундан солиқ тўланаётгани йўқ, у мамлакатнинг тараққиёти учун ишлатилмаяпти. Шунинг учун мен янаям ватанпарварроқ бўлишни таклиф қилган бўлардим, мигрантлар ҳам ўзининг солиғини мамлакат тараққиёти учун тўласин», — дейди у.
Изоҳ (0)