2013-yil 2-sentabr sanasi “Arsenal” muxlislari xotirasida uzoq vaqt qoladi. O‘shanda jamoa 42,5 million yevro evaziga Mesut O‘zilni xarid qilib, klub tarixidagi eng qimmat transferni amalga oshirgandi. Futbolchi bilan shartnoma imzolash esa ayg‘oqchilik hikoyasiga o‘xshash bo‘lgandi. Bu haqda londonliklarning sobiq direktori Dik Lou aytib bergandi.
“Bu ajoyib kun edi. Biz jahon darajasidagi, Yevropaning eng yorqin futbolchilaridan biri bilan shartnoma imzoladik. Shunday voqeaning qatnashchisi bo‘lish baxt.
Barcha hamjihat ishlagan edi. Yillar davomida birgalikdagi faoliyat samara keltirgan kun edi. Shuni unutmaslik lozim, O‘zilning transferi Garet Beylniki bilan chambarchas bog‘liq”.
O‘sha yozning asosiy transferi Garet Beylning “Tottenhem”dan “Real Madrid”ga o‘tishi bo‘ldi. U londonliklar safida mavsumni juda yuqori darajada o‘tkazdi va “qaymoqranglilar” nazariga tushdi. Biroq “Tottenhem” direktorlar kengashi rahbari Deniel Levi uelslik futbolchini shunchaki qo‘yib yuborishni istamasdi. Buning ustiga “Arsenal” imkoniyatdan foydalanib qoldi...
“Hattoki juda katta qudratga ega ‘Real Madrid’ Beylga zo‘rg‘a yetishgandi. Ular ‘shporlar’ga juda katta pul berdi, kamiga futbolchiga samoviy maosh va’da qildi. Bu esa jamoadan kimdir sotib yuborilishi lozimligini bildirardi. Aynan Beylning transferi bizni O‘zil tomon olib boradi.
Biz Madridning ogohlantiruvchi signaliga darhol munosabat bildirdik. Men ‘Real’ning bosh menejeri Xose Anxel Sanches bilan uchrashish uchun Madridga bordim. Ular Karim Benzema yoki Anxel di Mariyani sotish haqida o‘ylayotgandi.
Men Ivan Gazidis (o‘sha vaqtda londonliklar ijrochi direktori — izoh “Daryo”) va bosh murabbiy Arsen Vengerga qo‘ng‘iroq qildim. Biz juda ehtiyotkorona harakat qilardik, rostini aytsam, shubhalar ham bor edi. Lekin o‘sha uchrashuvda ‘Real’ kimnidir sotish istagida ekani aniq bo‘ldi”.
“Arsenal” “Fenerbahche” bilan Chempionlar Ligasi saralash doirasida o‘ynayotgandi, shuning uchun Gazidis Turkiyada edi. Muzokaralarda Louga yordam berish uchun Gazidis Turkiyadan Ispaniyaga qarab uchdi.
Ertasiga muzokaralarda O‘zil familiyasi birinchi marta tilga olindi.
“Biz Xose bilan muzokara olib bordik, u Anchelotti Benzemani ham, di Mariyani ham qo‘yib yuborish niyatida emasligini aytdi. Lekin O‘zil transferiga qarshi emasligini ham qo‘shib qo‘ydi.
Arsenga bu variant yoqdi. U bunday futbolchi jamoasida bo‘lishidan manfaatdor edi. Lekin oldimizda boshqa bir muammo paydo bo‘ldi — biz Mesutning o‘zi bilan kelisha olmadik.
Biz Mesut bilan muzokara o‘tkazish uchun ruxsat so‘radik, lekin madridliklar avval o‘zlari u bilan suhbatlashishini aytdi. Biroq bu qo‘ng‘iroq O‘zil uchun eng yoqimlisi bo‘lgan, deb o‘ylamayman. Shundan keyin biz Mesut, uning otasi va biznes-konsultant bilan gaplashib oldik. Ish bitgach, Gazidis bilan birga Londonga qaytib ketdik”.
Muzokaralar davom etdi — transfer oynasi yopilishiga 48 soat qolganda barchasi deyarli yakunlangan edi. Ammo Deniel Levi deb atalmish muammo paydo bo‘ldi. U Beylni sotishni oxirigacha kechiktirdi. Endi vaqt bizga qarshi o‘ynashni boshladi.
“Real Madrid” asabiylashishni boshladi. “Arsenal” shimoliy Londondagi qo‘shnilar O‘zil haqida eshitsa, xursand bo‘lmasligini tushunib turardi.
Yana bir murakkab tomoni, dedlaynga 36 soat qolganda “Arsenal” shimoliy London derbisida “shporlar”ga qarshi o‘ynashi kerak edi.
“Biz Madrid bilan oxirgi detallarni hal qilayotgandik. Ivan u yerda, men esa O‘zil bilan Myunxenda edim. Derbi kuni ertalab Ivan menga qo‘ng‘iroq qildi.
U haligacha muzokaralar yakunlanmagani, shuning uchun Londonga qayta olmayotganini aytdi. Ikkimizdan birimiz stadion direktorlar lojasida o‘tirishimiz kerak edi, yo‘qsa Levi shubhalanishi tayin.
Shu payt Xose Anxel Levi unga qo‘ng‘iroq qilganini va shart qo‘yganini aytdi: ‘Real’ ‘Arsenal’ga hech kimni sotmasligi kerak.
Ivan esa Deniel ko‘pirtirib yuborayotganini, ‘Tottenhem’ Beyl kelajakdagi sotuvini hisobga olib, ancha pul sarflaganini aytdi (‘shporlar’ Kristian Eriksen, Roberto Soldado, Sandroni xarid qilib ulgurgandi). Lekin bu madridliklarni tinchlantirmadi, ular meni Myunxenni tark etib, Londondagi o‘yinda qatnashishimni so‘radi.
11 soatlik parvozdan keyin to‘g‘ri stadionning direktorlar lojasiga borib o‘tirdim. U yerda Marko Baldini va Levi bor edi. Ular mening qayerda bo‘lganim bilan qiziqdi, men esa derbini o‘tkazib yubormaslik uchun shoshib kelganimni aytdim”.
Olivye Jiruning goli evaziga “Arsenal” g‘alaba qozondi. Shu o‘yindan so‘ng “Tottenhem” Beylning ketganini e’lon qildi.
Lou esa darhol Germaniyaga qaytib ketdi, u yerda jamoa shartnomaning oxirgi bandlari bo‘yicha ishlayotgan edi.
“Arsenal” bu transfer sir tutilishi uchun qo‘lidan kelgan barcha ishni qildi. Ammo boshqa bir muammo paydo bo‘ldi — O‘zil tibbiy ko‘rikdan o‘tayotgan klinikada ular kutilmagan “sovg‘a”ga duch keldi.
“Tibbiy ko‘rik Myunxendagi klinikalardan birida bo‘lib o‘tdi. O‘shanda ham biz buni sir tutishga urindik. Lekin yo‘lakda Lukas Podolskini ko‘rib qoldik. U tizzasini tekshirtirgani kelgan ekan.
O‘sha paytning o‘zida Arsenga qo‘ng‘iroq qildim va xabar tarqab ketishi haqida ogohlantirdim. Chunki Lukasning og‘zida gap turmasligini bilardim.
Bu vaqtda ‘Manchester Yunayted’ Mesutni ilib ketmoqchi bo‘layotgani haqidagi xabar xo‘jayinimizgacha yetib bordi. Ivan menga qo‘ng‘iroq qilib, O‘zilning otasi va biznes-konsultantidan ko‘z uzmasligimni aytdi. Men ular bilan birga barda soat 10:00 dan 22:00 gacha o‘tirishga majbur bo‘ldim. Parallel ravishda transfer borasidagi savollarni muhokama qildik.
O‘zil terma jamoa bilan yig‘inda, u bilan aloqaga chiqa olmasdik. Lekin biz epladik.
Juda ajoyib transferni amalga oshirdik. Bu ‘Arsenal’ tarixidagi eng qimmat transfer edi”, — deya eslaydi Dik Lou.
15-oktabr kuni 33 yoshini nishonlayotgan O‘zil “Arsenal”da yetti yil mobaynida to‘p surdi. U “kanonirlar” safida 254 ta o‘yin o‘tkazib, 44 ta gol va 77 ta golli uzatma muallifiga aylandi. Hozirda “Fenerbahche”da to‘p surayotgan Mesut “Arsenal” bilan uch martadan Angliya Kubogi va Superkubogida g‘olib bo‘lgan.
Izoh (0)