2013 йил 2 сентябрь санаси «Арсенал» мухлислари хотирасида узоқ вақт қолади. Ўшанда жамоа 42,5 миллион евро эвазига Месут Ўзилни харид қилиб, клуб тарихидаги энг қиммат трансферни амалга оширганди. Футболчи билан шартнома имзолаш эса айғоқчилик ҳикоясига ўхшаш бўлганди. Бу ҳақда лондонликларнинг собиқ директори Дик Лоу айтиб берганди.
«Бу ажойиб кун эди. Биз жаҳон даражасидаги, Европанинг энг ёрқин футболчиларидан бири билан шартнома имзоладик. Шундай воқеанинг қатнашчиси бўлиш бахт.
Барча ҳамжиҳат ишлаган эди. Йиллар давомида биргаликдаги фаолият самара келтирган кун эди. Шуни унутмаслик лозим, Ўзилнинг трансфери Гарет Бэйлники билан чамбарчас боғлиқ».
Ўша ёзнинг асосий трансфери Гарет Бэйлнинг «Тоттенҳэм»дан «Реал Мадрид»га ўтиши бўлди. У лондонликлар сафида мавсумни жуда юқори даражада ўтказди ва «қаймоқранглилар» назарига тушди. Бироқ «Тоттенҳэм» директорлар кенгаши раҳбари Дэниэл Леви уэлслик футболчини шунчаки қўйиб юборишни истамасди. Бунинг устига «Арсенал» имкониятдан фойдаланиб қолди...
«Ҳаттоки жуда катта қудратга эга ‘Реал Мадрид’ Бэйлга зўрға етишганди. Улар ‘шпорлар’га жуда катта пул берди, камига футболчига самовий маош ваъда қилди. Бу эса жамоадан кимдир сотиб юборилиши лозимлигини билдирарди. Айнан Бэйлнинг трансфери бизни Ўзил томон олиб боради.
Биз Мадриднинг огоҳлантирувчи сигналига дарҳол муносабат билдирдик. Мен ‘Реал’нинг бош менежери Хосе Анхель Санчес билан учрашиш учун Мадридга бордим. Улар Карим Бензема ёки Анхель ди Марияни сотиш ҳақида ўйлаётганди.
Мен Иван Газидис (ўша вақтда лондонликлар ижрочи директори — изоҳ «Дарё») ва бош мураббий Арсен Венгерга қўнғироқ қилдим. Биз жуда эҳтиёткорона ҳаракат қилардик, ростини айтсам, шубҳалар ҳам бор эди. Лекин ўша учрашувда ‘Реал’ кимнидир сотиш истагида экани аниқ бўлди».
«Арсенал» «Фенербаҳче» билан Чемпионлар Лигаси саралаш доирасида ўйнаётганди, шунинг учун Газидис Туркияда эди. Музокараларда Лоуга ёрдам бериш учун Газидис Туркиядан Испанияга қараб учди.
Эртасига музокараларда Ўзил фамилияси биринчи марта тилга олинди.
«Биз Хосе билан музокара олиб бордик, у Анчелотти Бенземани ҳам, ди Марияни ҳам қўйиб юбориш ниятида эмаслигини айтди. Лекин Ўзил трансферига қарши эмаслигини ҳам қўшиб қўйди.
Арсенга бу вариант ёқди. У бундай футболчи жамоасида бўлишидан манфаатдор эди. Лекин олдимизда бошқа бир муаммо пайдо бўлди — биз Месутнинг ўзи билан келиша олмадик.
Биз Месут билан музокара ўтказиш учун рухсат сўрадик, лекин мадридликлар аввал ўзлари у билан суҳбатлашишини айтди. Бироқ бу қўнғироқ Ўзил учун энг ёқимлиси бўлган, деб ўйламайман. Шундан кейин биз Месут, унинг отаси ва бизнес-консультант билан гаплашиб олдик. Иш битгач, Газидис билан бирга Лондонга қайтиб кетдик».
Музокаралар давом этди — трансфер ойнаси ёпилишига 48 соат қолганда барчаси деярли якунланган эди. Аммо Дэниэл Леви деб аталмиш муаммо пайдо бўлди. У Бэйлни сотишни охиригача кечиктирди. Энди вақт бизга қарши ўйнашни бошлади.
«Реал Мадрид» асабийлашишни бошлади. «Арсенал» шимолий Лондондаги қўшнилар Ўзил ҳақида эшитса, хурсанд бўлмаслигини тушуниб турарди.
Яна бир мураккаб томони, дедлайнга 36 соат қолганда «Арсенал» шимолий Лондон дербисида «шпорлар»га қарши ўйнаши керак эди.
«Биз Мадрид билан охирги деталларни ҳал қилаётгандик. Иван у ерда, мен эса Ўзил билан Мюнхенда эдим. Дерби куни эрталаб Иван менга қўнғироқ қилди.
У ҳалигача музокаралар якунланмагани, шунинг учун Лондонга қайта олмаётганини айтди. Иккимиздан биримиз стадион директорлар ложасида ўтиришимиз керак эди, йўқса Леви шубҳаланиши тайин.
Шу пайт Хосе Анхель Леви унга қўнғироқ қилганини ва шарт қўйганини айтди: ‘Реал’ ‘Арсенал’га ҳеч кимни сотмаслиги керак.
Иван эса Дэниэл кўпиртириб юбораётганини, ‘Тоттенҳэм’ Бэйл келажакдаги сотувини ҳисобга олиб, анча пул сарфлаганини айтди (‘шпорлар’ Кристиан Эриксен, Роберто Сольдадо, Сандрони харид қилиб улгурганди). Лекин бу мадридликларни тинчлантирмади, улар мени Мюнхенни тарк этиб, Лондондаги ўйинда қатнашишимни сўради.
11 соатлик парвоздан кейин тўғри стадионнинг директорлар ложасига бориб ўтирдим. У ерда Марко Балдини ва Леви бор эди. Улар менинг қаерда бўлганим билан қизиқди, мен эса дербини ўтказиб юбормаслик учун шошиб келганимни айтдим».
Оливье Жирунинг голи эвазига «Арсенал» ғалаба қозонди. Шу ўйиндан сўнг «Тоттенҳэм» Бэйлнинг кетганини эълон қилди.
Лоу эса дарҳол Германияга қайтиб кетди, у ерда жамоа шартноманинг охирги бандлари бўйича ишлаётган эди.
«Арсенал» бу трансфер сир тутилиши учун қўлидан келган барча ишни қилди. Аммо бошқа бир муаммо пайдо бўлди — Ўзил тиббий кўрикдан ўтаётган клиникада улар кутилмаган «совға»га дуч келди.
«Тиббий кўрик Мюнхендаги клиникалардан бирида бўлиб ўтди. Ўшанда ҳам биз буни сир тутишга уриндик. Лекин йўлакда Лукас Подольскини кўриб қолдик. У тиззасини текширтиргани келган экан.
Ўша пайтнинг ўзида Арсенга қўнғироқ қилдим ва хабар тарқаб кетиши ҳақида огоҳлантирдим. Чунки Лукаснинг оғзида гап турмаслигини билардим.
Бу вақтда ‘Манчестер Юнайтед’ Месутни илиб кетмоқчи бўлаётгани ҳақидаги хабар хўжайинимизгача етиб борди. Иван менга қўнғироқ қилиб, Ўзилнинг отаси ва бизнес-консультантидан кўз узмаслигимни айтди. Мен улар билан бирга барда соат 10:00 дан 22:00 гача ўтиришга мажбур бўлдим. Параллел равишда трансфер борасидаги саволларни муҳокама қилдик.
Ўзил терма жамоа билан йиғинда, у билан алоқага чиқа олмасдик. Лекин биз эпладик.
Жуда ажойиб трансферни амалга оширдик. Бу ‘Арсенал’ тарихидаги энг қиммат трансфер эди», — дея эслайди Дик Лоу.
15 октябрь куни 33 ёшини нишонлаётган Ўзил «Арсенал»да етти йил мобайнида тўп сурди. У «канонирлар» сафида 254 та ўйин ўтказиб, 44 та гол ва 77 та голли узатма муаллифига айланди. Ҳозирда «Фенербаҳче»да тўп сураётган Месут «Арсенал» билан уч мартадан Англия Кубоги ва Суперкубогида ғолиб бўлган.
Изоҳ (0)