Yozda Lionel Messi “Barselona”dan ketganidan keyin klub uning 10-raqamini muomaladan chiqaradimi yoki yo‘q degan savol juda ko‘p yangradi. Biroq La Liga qoidalari tufayli bu ishni amalga oshirib bo‘lmadi. Afsonaviy raqam esa xuddi bir vaqtlar “La Masiya”dan yetishib chiqqan Messi kabi yosh yulduz Ansu Fatiga berildi va bundan ko‘pchilik xursand ham bo‘ldi. Boisi bir vaqtlar aynan Messiga ham jamoaning kelajagi sifatida qaralib, unga afsonaviy raqam (10) ishonib topshirilgandi. Xo‘sh, ulardan oldin “Barselona”da 10-raqamga kimlar egalik qilgan, ushbu raqamda har doim ham yulduzlar harakat qilganmi? “Daryo” quyida ana shu savolga javob bergan holda, “Barselona” tarixidagi eng yaxshi o‘ninchi raqamlar haqida hikoya qiladi.
Diyego Maradona (1982—1984-yillar) — 47 o‘yin, 33 ta gol
Maradona garchi “Barselona”ning haqiqiy afsonasiga aylana olmagan bo‘lsa-da, yetarli miqdorda gol urishni uddalagan. Ko‘pchilik uning Yevropadagi faoliyatini “Napoli” nomi bilan bog‘lashga ko‘nikib qolgan. Biroq “Tilla bola”ning Kataloniyadagi sarguzashtlari ham alohida e’tirofga loyiq. Ammo Maradonaning o‘zi bu borada boshqacha fikrda, u Kataloniyani tark etgach, “Barsa”ga o‘tib, xatoga yo‘l qo‘yganini aytadi. Ispaniyada Maradona gepatit bilan og‘riydi, muntazam ravishda surunkali jarohatlardan aziyat chekadi. Jamoatchilik va matbuot esa ochiqchasiga uni tanqid qiladi. Bunga qaysidir ma’noda Diyegoning yuqori maoshi va tungi hayoti ham sabab bo‘ladi. Shu tariqa ikki yillik faoliyatdan so‘ng u “Napoli”ga qaytib ketadi. Shunga qaramay Diyego jamoada o‘zi haqidagi xotiralarni qoldira olgan, o‘sha paytlarda muxlislar uning o‘yinini jonli ko‘rish uchun ham stadionlarga tashrif buyurardi.
Romario (1993—1995-yillar) — 65 o‘yin, 39 ta gol
“Barselona”ning Maradonadan keyingi mashhur o‘ninchi raqam egasi Romario jamoada atigi bir yarim mavsum harakat qilgan. Ammo braziliyalik ushbu qisqa vaqt davomida o‘zining nimalarga qodir ekanligini isbotlay oldi va Ispaniya chempionatida g‘olib bo‘ldi. Shuningdek, U La Liga to‘purari sovrinini ham qo‘lga kiritdi. Biroq jamoaning o‘sha paytdagi bosh murabbiyi Yoxan Kroyf bilan kelishmovchilikdan so‘ng Braziliyaga qaytishga majbur bo‘ladi. Romarioning “Barselona”dagi faoliyatiga nisbatan “ozgina va sozgina” iborasini qo‘llash mumkin.
Rivaldo (1997—2002-yillar) — 235 o‘yin, 130 ta gol
O‘z davrining eng yaxshi futbolchilaridan biri bo‘lgan Rivaldo “Barselona”da yaxshi yillarni boshidan o‘tkazgan deyish mumkin, uning aynan “Barselona” safida “Oltin to‘p”ni qo‘lga kiritgani ham bunga misol bo‘la oladi. Biroq Rivaldoga katalon jamoasida o‘zini to‘laqonli ravishda ko‘rsatishga jarohatlar va Lui van Gal bilan bo‘lgan kelishmovchiliklar xalaqit beradi. Van Gal undan qanot futbolchisi sifatida foydalanadi, biroq Rivaldo hujum orti va markaziy yarim himoyada o‘ynashni afzal bilardi. Shunga qaramay Rivaldoning “Barselona”dagi statistikasi tahsinga loyiq. Shuningdek, u jamoa bilan ikki marta Ispaniya chempionatida g‘alaba qozongan.
Ronaldinyo (2003—2008-yillar) — 207 o‘yin, 94 ta gol
Krishtianu Ronaldu va Lionel Messi gol urish, “Oltin to‘p”ni qo‘lga kiritish mashinasiga aylangani hech kimga sir emas. Ammo “futbol sehrgari” — Ronaldinyo gol urish uchun emas, balki undan zavq olish uchun, maza qilib futbol o‘ynash uchun maydonda harakat qilardi. Ronaldinyo maydonda yuzida tabassum bilan shunday harakatlarni amalga oshirib tashlardiki, uning “fint”lari nafaqat muxlislar, balki unga qarshilik qilayotgan himoyachilarning ham aqlini shoshirib qo‘ygani bor gap. Aynan Ronaldinyo va unga o‘xshash futbolchilar (ular o‘zi unchalik ko‘p emas) futbolni san’at darajasiga olib chiqqan. Bunga misol tariqasida, futbolni sevgan inson, albatta, Ronaldinyoni ham yaxshi ko‘rishini (hech bo‘lmaganda yomon ko‘rmaydi) aytish mumkin.
Ronaldinyo “Barselona” bilan ikki marta Ispaniya chempionatida va bir bor Chempionlar Ligasida g‘olib bo‘lgan.
Lionel Messi (2003—2021-yillar) — 778 o‘yin, 672 ta gol
Futbolda ham boshqa sohalarda bo‘lgani kabi shunday odamlar borki, ular haqida gapirish, ularning faoliyatiga ta’rif berish xuddi ularning obro‘yi va shaxsiyatiga putur yetkazib qo‘yadigandek taassurot uyg‘otadi. Lionel Messini ham aynan shundaylar qatoriga qo‘shish mumkin. Olti karra “Oltin to‘p” sohibi “Barselona”da 17 yil davomida harakat qilib, qo‘lga kiritish mumkin bo‘lgan barcha sovrinlarga ega chiqqan va 10-raqamning haqiqiy egasi ekanligini isbotlagan. Umuman olganda, so‘nggi 15 yil ichida “Barselona” va Messi nomlarini alohida ishlatib bo‘lmay qolgandi, afsona faoliyatini ham aynan shu yerda yakunlashi kutilgandi. Biroq 2021-yilning yozida Messining jamoadan ketgani haqidagi xabar butun futbol olamini larzaga soldi. Uning keyingi manzili “PSJ” bo‘ldi, argentinalik daho hozircha Parij jamoasiga to‘liq moslashib ketolganicha yo‘q, balki bunga vaqt kerak bo‘lar, buning ustiga hali muxlislar ham uning “Barsa”dan ketganiga ko‘nikkani yo‘q.
Messi katalon klubi bilan Ispaniya chempionatida 10, Ispaniya Kubogi va Superkubogida 7, Chempionlar Ligasida 4, Yevropa Superkubogida va klublar o‘rtasidagi Jahon Chempionatida 3 martadan g‘alaba qozongan.
Ansu Fati (2019-yildan beri) — 46 ta o‘yin, 14 ta gol
Ro‘yxatning va umuman “Barselona” (asosiy jamoa) tarixidagi eng yosh futbolchiga 18 yoshida juda katta mas’uliyat yuklandi, u jamoada 10-raqamning yangi egasiga aylandi. 2019-yilda asosiy jamoada debyutini o‘tkazgan Fati darhol jamoaga moslashib olgandi va ketma-ket gollar ura boshlagandi. Biroq 2020-yilning noyabr oyida tizzasidan jarohat olib, bir yil davomida maydonga tusha olmadi.
10-raqam berilganidan keyingi ilk o‘yinidayoq gol urdi va qaysidir ma’noda o‘ziga bildirilgan ishonchni oqladi, goldan keyin esa “Barselona” muxlislari uni tik turgancha olqishladi, hatto ular orasida ko‘z yoshlarini tiya olmaganlar ham topildi...
Uning o‘zi “Barselona”da 10-raqam ostida to‘p surish haqida shunday deydi: “Men bu raqamli libosni kiyish imkoniyatidan minnatdorman. Bu katta sharaf. 10-raqam ‘Barsa’ uchun katta ahamiyatga ega. Bu raqamda Messi, Ronaldinyo va boshqa yetuk futbolchilar o‘ynagan”.
Izoh (0)