Saylov arafasida ijtimoiy tarmoqlarda o‘zbekistonliklarning, jumladan, yoshlarning fikrini chalg‘itishga qaratilgan turli postlar, video va audioroliklar aylanmoqda. Bunday g‘oyaviy tahdidlarga hamma o‘z fikrini, pozitsiyasini bildirayapti, ammo ular orasida xayrixohlar ham yo‘q deb bo‘lmaydi.
Xursand qiladigan jihat shuki, bugungi odamlar siyosiy jarayonlarning mas’uliyatini chuqur his etadigan, jamiyatdagi tinchlik va barqarorlikning shukronasini qilib, uni mustahkamlash yo‘lida bel bog‘lab mehnat qilayotgan bag‘rikeng, sabr-toqatli, mulohazali insonlardir.
“Bizning birovlardan ustunligimiz muhimmas, kechagi holimizdan ustunligimiz muhim”, degan gap bor. Darhaqiqat, keyingi yillarda oddiy turmush tarzida, oilaviy sharoit, ro‘zg‘orda real ijobiy o‘zgarishlar bo‘lganini hech kim inkor etolmaydi.
Bir vaqtlar plastik kartochkadagi pulni naqd qilish ilinjida unga-bunga iltimos qilish, naqdlashtirib bergan odamga yurakni yulgandek qilib ma’lum foizini qoldirish kabi holatlar bugun tushga aylandi.
Shunday paytlar bo‘ldiki, yaqinda bayramini nishonlagan o‘qituvchi-muallimlar qishloqlarda maoshining ma’lum foizi “naqdlashtiradigan” joyga, ma’lum foizini esa tuman markaziga borib, naqd qildirib kelib beradigan odam cho‘ntagiga kirishiga ko‘nikib qolgan edi.
Poytaxtda propiska yo‘qligidan turar-joyida minglab yoshlar “uchastkavoy”lar bilan it-mushuk bo‘lib, ishlayotgan joyidan ayrilib qolmasligi uchun yurak hovuchlab yashardi, bitta muhrning yo‘qligi dastidan poytaxtda yashash va ishlash orzusidan voz kechib ketgan vatandoshlar qancha edi.
Yaqinlarining operatsiyasi uchun xorijga olib borishga banklardan xorijiy valyuta ololmay, sarson-sargardon bo‘lgan insonlarning guvohi bo‘lganmiz.
Ming shukrki, bugun insonning izzat-nafsini toptaydigan bunday holatlarga barham berildi. Ammo ba’zilar hayotimizdagi bunday o‘zgarishlarni unutib, yangi-yangi ehtiyojlarni qondirish ilinjida dod solayotgandek.
Bugun shifokorning qizi, chorvadorning o‘g‘li, fermerning, prokurorning bolasi ham bilimi bo‘lsa, teppa-teng oliy o‘quv yurtiga o‘qishga qabul qilinayapti, ta’limdagi bu o‘zgarishlar qanchadan-qancha oilalarga quvonch, kelajakka ishonch bag‘ishladi.
Xullas, kechagi kundan xulosa chiqarib, erta uchun rejalar qilib yashashdan charchamaylik. Ulug‘ adibimiz Maqsud Shayxzoda hol-ahvol so‘rab kelgan shogirdlariga “Ahvolim kechagidan yaxshi, ertangidan yomon” deb javob berarkan. Shayxzoda domla lutf qilganlaridek, hayot kechagidan yaxshi, ertangidan yomon bo‘layotgani rost bo‘lsin!
Nurali Shodiyev, Davlat boshqaruvi akademiyasi dotsenti, siyosiy fanlar bo‘yicha falsafa doktori (PhD)
Izoh (0)