Сайлов арафасида ижтимоий тармоқларда ўзбекистонликларнинг, жумладан, ёшларнинг фикрини чалғитишга қаратилган турли постлар, видео ва аудиороликлар айланмоқда. Бундай ғоявий таҳдидларга ҳамма ўз фикрини, позициясини билдираяпти, аммо улар орасида хайрихоҳлар ҳам йўқ деб бўлмайди.
Хурсанд қиладиган жиҳат шуки, бугунги одамлар сиёсий жараёнларнинг масъулиятини чуқур ҳис этадиган, жамиятдаги тинчлик ва барқарорликнинг шукронасини қилиб, уни мустаҳкамлаш йўлида бел боғлаб меҳнат қилаётган бағрикенг, сабр-тоқатли, мулоҳазали инсонлардир.
«Бизнинг бировлардан устунлигимиз муҳиммас, кечаги ҳолимиздан устунлигимиз муҳим», деган гап бор. Дарҳақиқат, кейинги йилларда оддий турмуш тарзида, оилавий шароит, рўзғорда реал ижобий ўзгаришлар бўлганини ҳеч ким инкор этолмайди.
Бир вақтлар пластик карточкадаги пулни нақд қилиш илинжида унга-бунга илтимос қилиш, нақдлаштириб берган одамга юракни юлгандек қилиб маълум фоизини қолдириш каби ҳолатлар бугун тушга айланди.
Шундай пайтлар бўлдики, яқинда байрамини нишонлаган ўқитувчи-муаллимлар қишлоқларда маошининг маълум фоизи «нақдлаштирадиган» жойга, маълум фоизини эса туман марказига бориб, нақд қилдириб келиб берадиган одам чўнтагига киришига кўникиб қолган эди.
Пойтахтда прописка йўқлигидан турар-жойида минглаб ёшлар «участкавой»лар билан ит-мушук бўлиб, ишлаётган жойидан айрилиб қолмаслиги учун юрак ҳовучлаб яшарди, битта муҳрнинг йўқлиги дастидан пойтахтда яшаш ва ишлаш орзусидан воз кечиб кетган ватандошлар қанча эди.
Яқинларининг операцияси учун хорижга олиб боришга банклардан хорижий валюта ололмай, сарсон-саргардон бўлган инсонларнинг гувоҳи бўлганмиз.
Минг шукрки, бугун инсоннинг иззат-нафсини топтайдиган бундай ҳолатларга барҳам берилди. Аммо баъзилар ҳаётимиздаги бундай ўзгаришларни унутиб, янги-янги эҳтиёжларни қондириш илинжида дод солаётгандек.
Бугун шифокорнинг қизи, чорвадорнинг ўғли, фермернинг, прокурорнинг боласи ҳам билими бўлса, теппа-тенг олий ўқув юртига ўқишга қабул қилинаяпти, таълимдаги бу ўзгаришлар қанчадан-қанча оилаларга қувонч, келажакка ишонч бағишлади.
Хуллас, кечаги кундан хулоса чиқариб, эрта учун режалар қилиб яшашдан чарчамайлик. Улуғ адибимиз Мақсуд Шайхзода ҳол-аҳвол сўраб келган шогирдларига «Аҳволим кечагидан яхши, эртангидан ёмон» деб жавоб бераркан. Шайхзода домла лутф қилганларидек, ҳаёт кечагидан яхши, эртангидан ёмон бўлаётгани рост бўлсин!
Нурали Шодиев, Давлат бошқаруви академияси доценти, сиёсий фанлар бўйича фалсафа доктори (PhD)
Изоҳ (0)