O‘zbekistonda tovar va xizmatlar haqidagi ma’lumotlarni davlat tilida ko‘rsatish shart etib belgilanmoqda

Oliy Majlis Qonunchilik palatasining 12-oktabrdagi majlisida “Iste’molchilarning huquqlarini himoya qilish to‘g‘risida”gi qonunga qo‘shimcha va o‘zgartishlar kiritish haqidagi qonun loyihasi muhokama qilindi. Bu haqda quyi palata matbuot xizmati xabar berdi.

Ma’lum qilinishicha, qonun loyihasini maromiga yetkazishda iste’molchilar huquqlarini kafolatlash, sotuvchi (ishlab chiqaruvchi, ish va xizmat ko‘rsatuvchi) mas’uliyatini yanada oshirishga qaratilgan normalar bilan boyitilgan.

Shuningdek, ta’kidlanishicha, qonun loyihasidan ishlab chiqaruvchi haqida, savdo va xizmat ko‘rsatish qoidalari, tovar to‘g‘risidagi axborotni iste’molchilarga davlat tilida to‘liq yetkazish, tovarni ekspertizadan o‘tkazish holatlari shartligi o‘rin olgan.

“Bundan tashqari, loyihada vakolatli davlat organi va nodavlat jamoat birlashmalarining iste’molchilar huquqlarini himoya qilish sohasidagi vakolat va huquqlari mustahkamlab qo‘yilmoqda. Loyiha tovarlarni (ishlarni, xizmatlarni) masofadan turib, axborot tizimlaridan foydalangan holda realizatsiya qilish chog‘ida iste’molchilarning huquqlari buzilishiga yo‘l qo‘ymaslik va ularning oldini olishga qaratilgan normalar bilan ham to‘ldirilgan”, — deyiladi xabarda.

Deputatlarning qayd etishicha, qonun loyihasining qabul qilinishi iste’molchilar huquqlari buzilishining oldini olish, sotuvchining iste’molchi oldidagi mas’uliyati va javobgarligini oshirishga xizmat qiladi.

Majlisda qonun loyihasi deputatlar tomonidan uchinchi o‘qishda qabul qilingan va Senatga yuborilgan.

Avvalroq Chirchiq shahar hokimligi Ma’naviyat bo‘linmasi tashabbusi bilan o‘zbek tilida to‘g‘ri yozilgan, doimo zaruriy ehtiyojda bo‘lgan so‘z va nomlanishlarni kichik formatdagi flayerlarga chiqarib, eng qulay joylaridagi obyektlarda joylashtirish chelenjiga start berilgandi. Bu ijtimoiy tarmoqlarda keng bahs-munozaralarga sabab bo‘lgach, hokimlik holatga munosabat bildirdi. Unda ta’kidlanishicha, Chirchiq shahar hokimligi o‘zbek tilida gapirish targ‘ib qilingan flayerlarda hech bir tilni kamsitish maqsad qilinmagan. Keyinroq hokimining matbuot kotibi ijtimoiy tarmoqlardagi ommaviy munozara paytida davlat xizmatchisining maqomiga xos bo‘lmagan tarzda o‘z fikrini noto‘g‘ri shaklda bildirgani uchun ishdan olingandi.