Farg‘ona viloyati IIB ijtimoiy tarmoqlarda tarqalgan “Baraka burger” nomli do‘konning oynalari sindirilib, yoqib yuborilgani tasvirlangan video yuzasidan rasmiy ma’lumot berdi.
Aniqlanishicha, 5-oktabr kuni E. ismli shaxs va uning tanishlari hamda fuqaro O. va boshqalar o‘rtasida kelishmovchilik kelib chiqqan. Shu sababli ular jamiyatda yurish-turish qoidalarini qasddan mensimasdan, jamoat joyida bir-biriga tan jarohati yetkazgan. Shundan so‘ng E.va uning sheriklari bezorilik xatti-harakatlarini davom ettirib, o‘zganing mulkini qasddan nobud qilish maqsadida O.ga tegishli bo‘lgan “Baraka burger” do‘koni oynalarini sindirib, o‘t qo‘ygan.
Mazkur holat yuzasidan Farg‘ona shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilib, dastlabki tergovga kirishilgan.
Jinoyat ishi bo‘yicha gumonlanuvchilar protsessual tartibda ushlangan bo‘lib, hozirda qolgan ishtirokchilarni aniqlash choralari ko‘rilmoqda. Tergov davomida ishga aloqador bo‘lgan barcha shaxslarning harakatlariga huquqiy baho beriladi.
Mazkur jinoyat ishi bo‘yicha Farg‘ona viloyati IIB huzuridagi Tergov boshqarmasi tomonidan tergov harakatlari davom ettirilmoqda. Ta’kidlanishicha, jinoyat ishining tergovi Farg‘ona viloyati prokurori hamda Ichki ishlar boshqarmasi boshlig‘i tomonidan alohida nazoratga olingan.
Avvalroq Toshkentda o‘zaro urushib qolgan bolalarini ajratishga chiqqan ota-onalar o‘rtasida janjal sodir bo‘lgani, Farg‘onada pichoq va qilichlari bo‘lgan 20 nafarga yaqin shaxs ishtirokida janjal yuzaga kelgani to‘g‘risida xabar berilgandi.
Izoh (0)