Фарғона вилояти ИИБ ижтимоий тармоқларда тарқалган «Барака бургер» номли дўконнинг ойналари синдирилиб, ёқиб юборилгани тасвирланган видео юзасидан расмий маълумот берди.
Аниқланишича, 5 октябрь куни Э. исмли шахс ва унинг танишлари ҳамда фуқаро О. ва бошқалар ўртасида келишмовчилик келиб чиққан. Шу сабабли улар жамиятда юриш-туриш қоидаларини қасддан менсимасдан, жамоат жойида бир-бирига тан жароҳати етказган. Шундан сўнг Э.ва унинг шериклари безорилик хатти-ҳаракатларини давом эттириб, ўзганинг мулкини қасддан нобуд қилиш мақсадида О.га тегишли бўлган «Барака бургер» дўкони ойналарини синдириб, ўт қўйган.
Мазкур ҳолат юзасидан Фарғона шаҳар Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят кодексининг 277-моддаси (безорилик) билан жиноят иши қўзғатилиб, дастлабки терговга киришилган.
Жиноят иши бўйича гумонланувчилар процессуал тартибда ушланган бўлиб, ҳозирда қолган иштирокчиларни аниқлаш чоралари кўрилмоқда. Тергов давомида ишга алоқадор бўлган барча шахсларнинг ҳаракатларига ҳуқуқий баҳо берилади.
Мазкур жиноят иши бўйича Фарғона вилояти ИИБ ҳузуридаги Тергов бошқармаси томонидан тергов ҳаракатлари давом эттирилмоқда. Таъкидланишича, жиноят ишининг тергови Фарғона вилояти прокурори ҳамда Ички ишлар бошқармаси бошлиғи томонидан алоҳида назоратга олинган.
Аввалроқ Тошкентда ўзаро урушиб қолган болаларини ажратишга чиққан ота-оналар ўртасида жанжал содир бўлгани, Фарғонада пичоқ ва қиличлари бўлган 20 нафарга яқин шахс иштирокида жанжал юзага келгани тўғрисида хабар берилганди.
Изоҳ (0)