Dunyo va o‘zbek sportiga oid 5-oktabr kunining eng muhim xabarlari dayjesti bilan tanishing.
O‘zbekiston
Futbol bo‘yicha O‘zbekiston Superligasining 22-tur o‘yinlari boshlanish vaqtlari ma’lum bo‘ldi.Professional futbol ligasining (PFL) ma’lum qilishicha, 22-turdan o‘rin olgan bellashuvlar 15—17-oktabr kunlari bo‘lib o‘tadi.
Superliga
22-tur o‘yinlari
15-oktabr
18:30 “Nasaf” — “Metallurg”
18:30 “OKMK” — “Mash’al”
16-oktabr
16:15 “Paxtakor” — “Qizilqum”
17:00 “Turon” — “Surxon”
18:30 “So‘g‘diyona” — “Qo‘qon-1912”
17-oktabr
17:00 “Navbahor” — “Bunyodkor”
17:00 “Lokomotiv” — “Andijon”.
“Real” Mbappe transferini yanvarda hal qilmoqchi
“Real Madrid” prezidenti Florentino Peres klub qishki transfer oynasida “PSJ” hujumchisi Kilian Mbappeni sotib olishga harakat qilishini ma’lum qildi.
“Umid qilamanki, 1-yanvargacha hamma narsa hal bo‘ladi”, — deydi Peres.
Qayd etish kerak, Madrid klubi o‘tgan yozda ham Mbappeni sotib olmoqchi edi, biroq “PSJ” “qirollik klubi”ning har ikkala transfer taklifiga rad javobini bergandi.
Fransiyalik futbolchi ushbu haftada bergan intervyusida “Real”ga ketmoqchi ekanligini tan oldi, biroq kelajagi qanday bo‘lishini bilmasligini ta’kidladi.
Levandovski “Bavariya”da qolmoqchi
Robert Levandovski “Bavariya” bilan shartnomasini 2025-yilgacha uzaytirmoqchi, deb xabar bermoqda Bild jurnalisti Kristian Falk.
Polshalik hujumchining Myunxen klubi bilan amaldagi shartnomasi 2023-yilda o‘z nihoyasiga yetadi. U 2014-yildan beri “Bavariya” sharafini himoya qilib keladi.
Eronda ikki yil deganda ilk marta ayollarning stadionlarga kirishiga ruxsat etiladi
Eron terma jamoasining JCh—2022 saralashi doirasida Tehronda bo‘lib o‘tadigan Janubiy Koreyaga qarshi o‘yiniga ikki yil ichida ilk marta ayollar kiritiladi. Bu haqda Yahoo xabar berdi.
Eronlik ayollar oxirgi marta 2019-yilning oktabrida Kambodjaga qarshi o‘yinda (14:0) mamlakat terma jamoasini stadiondan turib qo‘llab-quvvatlagandi.
Ma’lumot uchun, Eronda 1979-yilgi inqilobdan keyin ayollarning stadionlarga kirishi taqiqlangan. Bunga rasmiy sabab sifatida ularni stadiondagi erkaklarning odobsiz xatti-harakatlaridan himoya qilish istagi bo‘lgan.
Transferlardan 115 million yevro qarzi bor “Barselona”
“Barselona”ning transferlardan 115 million yevro qarzi borligi ma’lum bo‘ldi. Marca’ning yozishicha, katalon klubi avvalgi transferlarga sezilarli darajada ko‘p pul sarflashiga to‘g‘ri keladi.
Xususan, kataloniyaliklar Miralem Pyanich transferi uchun “Yuventus”ga 39 mln yevro to‘lashi lozim. “Ayaks”dan esa Frenki de Yong (32 mln) va Serjinyo Dest (16 mln) uchun umumiy hisobda 48 mln qarzdor. Bundan tashqari, klub Filippe Koutinyo xaridi uchun ham “Liverpul”ga 13 mln yevro to‘lashi kerak.
Kuchli beshlik chempionatlarining eng qimmat tarkibga ega klublari reytingi e’lon qilindi
Xalqaro sport tadqiqotlari markazi (CIES) Yevropaning top-5 ligalarining eng qimmat tarkibga ega klublari ro‘yxatini e’lon qildi.
Ish jarayoni tashkilot tomonidan yaratilgan maxsus algoritm yordamida amalga oshirilgan. Hisoblashda futbolchilarning transfer narxi 1-oktabr holatiga ko‘ra olingan. Shu bilan birga, ijarada bo‘lgan futbolchilar hisobga olinmagan.
Hisob-kitoblarga ko‘ra, ro‘yxatning birinchi uchligini APL klublari egalladi: “Manchester Siti”, “Manchester Yunayted” va “Chelsi”.
Kuchli 20 talik quyidagicha ko‘rinish oldi:
1. “Manchester Siti” (Angliya) – 1,280 mlrd yevro;
2. “Manchester Yunayted” (Angliya) – 1,214 mlrd yevro;
3. “Chelsi” (Angliya) – 946 mln yevro;
4. “Barselona” (Ispaniya) – 896 mln yevro;
5. “Bavariya” (Germaniya) – 890 mln yevro;
6. “Liverpul” (Angliya) – 868 mln yevro;
7. “Real” (Ispaniya) – 846 mln yevro;
8. “PSJ” (Fransiya) – 808 mln yevro;
9. “Borussiya D” (Germaniya) – 687 mln yevro;
10. “Atletiko” (Ispaniya) – 662 mln yevro;
11. “Yuventus” (Italiya) – 618 mln yevro;
12. “Leypsig” (Germaniya) – 590 mln yevro;
13. “Tottenhem” (Angliya) – 586 mln yevro;
14. “Arsenal” (Angliya) – 563 mln yevro;
15. “Bayer” (Germaniya) – 537 mln yevro;
16. “Lester” (Angliya) – 480 mln yevro;
17. “Inter” (Italiya) – 469 mln yevro;
18. “Milan” (Italiya) – 434 mln yevro;
19. “Sevilya” (Ispaniya) – 425 mln yevro;
20. “Roma” (Italiya) – 415 mln yevro.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)