Dunyo va o‘zbek sportiga oid 4-oktabr kunining eng muhim xabarlari dayjesti bilan tanishing.
O‘zbekiston
Murodjon Ahmadaliyevning himoya jangi sanasi ma’lum bo‘ldi
Professional boks bo‘yicha ikkinchi yarim yengil vazn (-55,34 kg) toifasida WBA va IBF kamarlari sohibi Murodjon Ahmadaliyevning (9-0, 7 KO) amerikalik Ronni Riosga (33-3, 16 KO) qarshi himoya jangining sanasi ma’lum bo‘ldi. Bu haqda taniqli boks jurnalisti Mayk Koppinjerga tayanib “Olamsport” xabar berdi.
Qayd etilishicha, jang 19-noyabr kuni AQShda bo‘lib o‘tadi. Kechaning markaziy jangida o‘rta vazn toifasidagi Jeyson Kuingli WBO chempioni Demetrius Andradega qarshi ringga ko‘tariladi.
Eslatib o‘tamiz, Murodjon Ahmadaliyev so‘nggi jangida yaponiyalik Riyosuke Ivasaga qarshi ringga chiqib, chempionlik kamarlarini himoya qilgandi.
Jahon
Holand oktabr oyidagi FIFA kunlarida Norvegiyaga yordam bera olmaydi
“Borussiya D” hujumchisi Erling Holand Norvegiya terma jamoasining oktabr oyida bo‘lib o‘tadigan o‘yinlarini o‘tkazib yuboradi, deb xabar berdi Kicker.
21 yoshli forvard bo‘lajak o‘yinlarda jarohati tufayli qatnasha olmasligini ma’lum qilgan. Qayd etish kerak, u jarohati sababli “Borussiya D”ning ham so‘nggi 3 ta o‘yinini o‘tkazib yubordi.
Norvegiya terma jamoasi JCh—2022 saralashi doirasida 8-oktabr kuni Turkiya bilan bahs yuritsa, 11-oktabrda Chernogoriyaga qarshi maydonga tushadi.
Millatlar Ligasi yarim finaliga hakamlar tayinlandi
Italiya — Ispaniya uchrashuvi 6-oktabr kuni “San-Siro” stadionida bo‘lib o‘tadi. Bellashuv Toshkent vaqti bilan soat 21:45 da boshlanadi.
17 yil avvalgi natijasini takrorlagan “Milan”
“Milan” A Seriyaning 2021/22-yilgi mavsumida 7-turdan keyin 19 ochko jamg‘arishga muvaffaq bo‘ldi va 2003/04-yilgi birinchilikdagi natijasini takrorladi. E’tiborlisi, o‘sha mavsumda jamoa chempionlikni qo‘lga kiritgandi.
Jamoa hozirda musobaqa jadvalida 2-o‘rinni egallab turibdi.
Mavsum boshidan beri mag‘lubiyat nimaligini bilmayotgan “Napoli”
“Napoli” 2021/22-yilgi mavsum boshidan beri kuchli beshlik chempionatlarida ochko yo‘qotmagan yagona klub bo‘lib turibdi.
Luchano Spaletti boshchiligidagi neapolliklar A Seriyaning 7-turidan keyin 21 ochko bilan musobaqa jadvalida birinchi o‘rinda bormoqda.
Kumanga muddat belgilagan “Barselona”
“Barselona” bosh murabbiyi Ronald Kumanning jamoadagi kelajagi haqidagi qaror 24-oktabr sanasidan keyin qabul qilinishi mumkin, deb yozmoqda Marca.
Nashrga ko‘ra, klub prezidenti Xoan Laporta qisqa vaqt mobaynida niderlandiyalik mutaxassisga munosib o‘rinbosar topish mushkul bo‘lgani uchun uni ishdan bo‘shatmagan. Bundan tashqari, moliyaviy cheklovlar bunda muhim rol o‘ynagani aytilmoqda.
Qayd etilishicha, rahbariyat murabbiyning ishiga 24-oktabrdan keyin baho beradi. “Barselona” bungacha “Valensiya” (17-oktabr), “Dinamo Kiyev” (20-oktabr) va “Real” (24-oktabr) jamoalariga qarshi o‘yin o‘tkazadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)