Bag‘doddagi COVID-kasalxonada yong‘in yuz berdi, 80 dan ortiq odam halok bo‘ldi. Iroqda uch kunlik motam e’lon qilindi (video)

Iroqning Bag‘dod shahrida joylashgan Ibn al-Xatib kasalxonasida yong‘in sodir bo‘ldi, deb yozadi Meduza. Al-Hadath telekanali ma’lumotlariga ko‘ra, kamida 82 kishi halok bo‘lgan, yana 110 kishi jabrlangan.

Yong‘in koronavirus bemorlari uchun intensiv davolash bo‘limida yuzaga kelgan. Unga kislorod ballonlari saqlanadigan ombordagi nosozlik tufayli sodir bo‘lgan portlash sababchi bo‘lgani ta’kidlanmoqda. Ba’zi bemorlar yong‘indan qochish uchun derazalardan sakragan. Ikki qavatli bino deyarli to‘liq yonib bitgan.

Kasalxonada yong‘indan himoya tizimlari bo‘lmagan, osma shift esa olovning yonilg‘i materiallariga tezkorlik bilan tarqalish imkonini bergan. Fuqarolik mudofaasi ma’lum qilishicha, qurbonlarning ko‘pchiligi sun’iy nafas oldirish apparatlaridan uzib qo‘yishga to‘g‘ri kelganidan vafot etgan, qolganlar tutundan bo‘g‘ilib o‘lgan.

Iroq Sog‘liqni saqlash vazirligi halok bo‘lganlar va jabrlanganlar sonini rasman e’lon qilgani yo‘q, ammo kasalxonadan 200 ga yaqin odam qutqarilganini qayd etdi.

Yong‘indan keyin ba’zi siyosatchilar, jamoat arboblari va parlament a’zolari Iroq sog‘liqni saqlash vaziri Hasan al-Tamimiyning iste’fosini talab qildi.

Iroqda uch kunlik motam e’lon qilindi.

The fire caused many of the oxygen tanks designated to support the #COVID19 patients in the hospital to explode. #Baghdad so far dozens of victims have been reported. pic.twitter.com/OAC8Jt3jq3

— Steven Nabil (@thestevennabil) April 24, 2021

Big disaster, 55 corona patients dead in fire caught Abn Al khateeb hospital in #Baghdad, the fire broke up after oxygen cylinder has exploded. pic.twitter.com/IK1L0KgZUH

— Ammar karim (@ammar_afp) April 24, 2021

Avvalroq Hindistonning Maxarashtra shtatidagi xususiy kasalxonada yong‘in sodir bo‘lib, kamida 13 kishi halok bo‘lgan edi. Koronavirus bo‘limida o‘t chiqqan edi.

Shuningdek, xuddi shu shtatda koronavirusga chalingan bemorlarni davolovchi kasalxonada kislorodning sisternadan sizib chiqishi oqibatida 24 nafar odam nafasi qaytib, hayotdan ko‘z yumgan edi.