Руминиядаги COVID-касалхонада ёнғин чиқиб, 9 киши ҳалок бўлди (фото ва видео)

Руминиянинг Констанса шаҳрида коронавирусга чалинганлар учун мўлжалланган юқумли касалликлар шифохонаси ёниб кетди. Оқибатда, камида 9 киши ҳалок бўлган, деб ёзади Associates Press (AP) маҳаллий ҳукуматга таяниб.

Ёнғин реанимация бўлимида пайдо бўлган. Ҳодиса сабаблари ҳозирча номаълум. Мамлакат Соғлиқни сақлаш вазирлиги батафсил маълумот кейинроқ матбуот анжуманида тақдим этилишини таъкидлади.

Қайд этилишича, касалхонада 113 нафар бемор даволанаётганди, улардан 10 нафари реанимация бўлимида бўлган. Беморларнинг бир нечтасини дераза орқали эвакуация қилишга тўғри келган.

Сентябрь бошида Шимолий Македониянинг Тетово шаҳрида COVID-19 беморлари даволанаётган касалхонада ёнғин чиққанди. Ҳодиса оқибатида камида 10 киши ҳалок бўлган.

Июль ойида эса Ироқнинг Насирия шаҳридаги COVID-касалхонада ёнғин содир бўлганди. Ҳодиса қурбонларининг сони 77 кишига етган, 20 киши эвакуация натижасида қутқариб қолинган.

Шунингдек, 24 апрель куни Ироқнинг Бағдод шаҳрида жойлашган Ибн ал-Хатиб касалхонасида ёнғин содир бўлганди. Касалхонада ёнғиндан ҳимоя тизими бўлмаган. Дастлабки маълумотларга кўра, ёнғин бошланишига кислород баллонининг портлаши сабаб бўлган. Сўнгги маълумотлар бўйича 88 киши ҳалок бўлган, 100 дан ортиғи жароҳат олган. Қурбонларнинг камида 28 нафари сунъий нафас олдириш аппаратларига уланган беморлар бўлган.

Ўша ёнғиндан кейин Ироқда уч кунлик мотам эълон қилинганди. Ироқ соғлиқни сақлаш вазири ва Бағдод губернатори ишдан бўшатилган.