Shimoliy Makedoniyaning shimoli-g‘arbidagi Tetovo shahrida COVID-19 bemorlari davolanayotgan kasalxonada yong‘in sodir bo‘ldi. Hodisa oqibatida kamida 10 kishi halok bo‘ldi. Bu haqda mamlakat sog‘liqni saqlash vaziri Venko Filipchega tayanib, “Korrespondent.net” xabar berdi.
“Ayni paytda yong‘in oqibatida 10 kishi halok bo‘lgani tasdiqlandi, ammo bu raqam oshishi mumkin”, — deb yozadi Sog‘liqni saqlash vazirligi rahbari Twitter’da. Vazir qurbonlar va jarohatlanganlarning oilalariga hamdardlik bildirdi.
Filipchening so‘zlariga ko‘ra, yong‘in allaqachon bartaraf etilgan, barcha tez yordam guruhlari jabrlanganlarga yordam berish uchun safarbar qilingan.
Shu bilan birga, mahalliy “Alsat-M” telekanali xabar berishicha, 14 kishi yong‘in qurboniga aylangan, yana 20 ga yaqin bemor jarohatlangan. Olovni o‘chirishga 7 ta maxsus texnika va 30 nafar o‘t o‘chiruvchi jalb qilingan.
Yong‘in sabablari hozircha noma’lum.
Iyul oyida Iroqning Nasiriya shahridagi COVID-19 bemorlariga mo‘ljallangan kasalxonada yong‘in sodir bo‘lgandi. Hodisa qurbonlarining soni 77 kishiga yetgan, 20 kishi evakuatsiya natijasida qutqarib qolingan.
Shuningdek, 24-aprel kuni Iroqning Bag‘dod shahrida joylashgan Ibn al-Xatib kasalxonasida yong‘in sodir bo‘lgandi. Kasalxonada yong‘indan himoya tizimi bo‘lmagan. Dastlabki ma’lumotlarga ko‘ra, yong‘in boshlanishiga kislorod ballonining portlashi sabab bo‘lgan. So‘nggi ma’lumotlar bo‘yicha 88 kishi halok bo‘lgan, 100 dan ortig‘i jarohat olgan. Qurbonlarning kamida 28 nafari sun’iy nafas oldirish apparatlariga ulangan bemorlar bo‘lgan.
O‘sha yong‘indan keyin Iroqda uch kunlik motam e’lon qilingandi. Iroq sog‘liqni saqlash vaziri va Bag‘dod gubernatori ishdan bo‘shatilgan.