Berlin saylov komissiyasi raisi Petra Mixaelis iste’foga chiqdi va Germaniyadagi federal saylovlar paytida yuz bergan tartibsizliklar uchun javobgarlikni o‘z zimmasiga oldi. Bu haqda Deutsche Welle nashri xabar berdi.
Ma’lum qilinishicha, Berlin Senati raisni davlat saylov qo‘mitasining 11 va 14-sentabrdagi yig‘ilishlaridan so‘ng darhol lavozimidan ozod qilmoqda. Mixaelis bu lavozimda 2010-yildan buyon ishlab kelayotgandi.
“Men hukumat rasmiysi sifatida saylov shartlari bo‘yicha saylov uchastkalarini o‘z holatiga qaytarish mas’uliyatini o‘z zimmamga olaman. Men Berlin Senatidan meni lavozimimdan ozod qilishini va vorisimni tasdiqlashini so‘rayman”, — degan Mixaelis va Berlin Senatini oktabrda uning o‘rnini egallaydigan nomzod topishga chaqirgan.
26-sentabr kuni Berlin fuqarolari Bundestag a’zolarini, shuningdek, shahar va munitsipalitet vakillarini saylagan edi. Ovoz berish paytida shaharda marafon bo‘lib o‘tgan, bu saylov byulletenlarini saylov uchastkalariga tashishni qiyinlashtirgan. Shu munosabat bilan, Berlin aholisi ovoz berish uchun uzun navbatda turishga majbur bo‘lgan.
Mahalliy vaqt bilan soat 18:00 da yopilishi kerak bo‘lgan bo‘limlar mavjud vaziyatni hisobga olgan holda, o‘z ishini davom ettirgan. Ta’kidlanishicha, Sharlottenburg-Vilmersdorf va Fridrixsayn hududlari tartibsizliklardan eng ko‘p zarar ko‘rgan.
Saylovlar jarayonidagi muvaffaqiyatsizlikka bir vaqtning o‘zida bir nechta saylovlarning o‘tkazilishi, koronavirus cheklovlari, shuningdek, byulletenlarning yetishmasligi sabab bo‘lgan deb hisoblanmoqda. Chunki, federal parlament saylovidan tashqari, poytaxt saylovchilari Berlin shahrining yangi parlamentini saylash uchun saylov uchastkalariga kelgan. Shuningdek, shaharda alohida munitsipal saylovlar va uy-joy mulkdorlari to‘g‘risida referendum o‘tkazilgan.
Saylovlardagi holat bo‘yicha hukumat olib borgan dastlabki tekshiruv Berlindagi 2257 ta saylov markazidan 100 ga yaqinida muammolarni aniqladi. Tartibsizliklar yuzasidan to‘la tergov natijalari kelasi hafta e’lon qilinishi kutilmoqda.
Izoh (0)