Chexiya poytaxti Praga yaqinida joylashgan Chernoshitse shahar munitsipaliteti uning ma’muriy hududida yashovchi bosh vazir va milliarder Andrey Babishga 250 ming kron (taxminan, 11 ming dollar) miqdorida jarima soldi. Bu haqda 30-sentabr kuni Denik Právo gazetasiga tayanib, “TASS” xabar berdi.
Chexiya bosh vaziri davlat va o‘z manfaatlarining to‘qnashuvi munosabati bilan jarimaga tortildi. Yanvar oyida munitsipalitetga Transparency International tashkilotidan shikoyat kelib tushgan, tashkilot Babishni o‘ziga tegishli ommaviy axborot vositalari orqali jamoatchilik fikrining shakllanishiga ta’sir qilganlikda gumonlagan. Shikoyat ma’muriy tartibda ko‘rib chiqildi.
Korrupsiyaga qarshi kurashuvchi ushbu nodavlat xalqaro tashkilot uch yil oldin ham Chernoshitse munitsipalitetiga Chexiya bosh vaziri ustidan xuddi shunday shikoyat yuborgandi. Amaldagi qonunchilikka ko‘ra ma’muriy nizolarni ko‘rib chiqish bilan shug‘ullanadigan mahalliy hokimiyat organlari tomonidan uzoq ko‘rib chiqilgandan so‘ng, shikoyat rad etilgan.
Avvalroq Babish Transparency International tashkilotining xatti-harakatlarini izohlar ekan, o‘zini katta siyosatdan chetlatishga urinishayotganini aytdi. Uning ta’kidlashicha, tashkilotning harakatlari ortida siyosiy raqiblari turibdi. Siyosatchining advokati Chernoshitse munitsipalitetining ma’muriy hukmiga norozilik bildirgan.
Avvalroq Chexiya sobiq prezidenti niqobni noto‘g‘ri taqqani uchun 3 ming krona (137 dollar) jarimaga tortilgandi.
Mavzuga doir:
- Braziliya prezidenti koronavirusga qarshi qoidalarni buzgani uchun jarimaga tortildi
- Fransiya sobiq bosh vaziri Fransua Fiyon rafiqasini soxta ishga joylashtirgani uchun 5 yilga ozodlikdan mahrum etildi
- Kanada bosh vaziri deklaratsiya qilinmagan ko‘zoynak uchun 100 dollar miqdoridagi jarimaga tortildi
Izoh (0)