Suvosti kemalari bilan bog‘liq kelishmovchilikdan keyin Parijga chaqirib olingan Fransiyaning AQShdagi elchisi Filipp Etyen Vashingtonga qaytdi. Avvalroq Fransiya prezidenti Emmanuel Makron diplomat AQShga 29-sentabrda qaytishini aytgandi.
Fransiya elchixonasi vakilining AFP’ga ma’lum qilishicha, Filipp Etyen 29-sentabr kuni tushdan keyin Vashingtondagi Dalles aeroportiga yetib kelgan.
Sentabr oyining o‘rtalarida AQSh, Avstraliya va Buyuk Britaniya AUKUS alyansi tuzilganini e’lon qildi, unda Avstraliyani Amerikaning atom suvosti kemalari bilan jihozlash nazarda tutilgan. Natijada Avstraliya Fransiyaning Naval Group harbiy kemasozlik kompaniyasi bilan tuzgan rekord darajada qimmat shartnomani to‘xtatdi.
Avstraliya uni 2016-yilda imzolagan, shartnoma 12 ta oddiy suvosti kemasini qurishni nazarda tutgan. Loyihaga 90 milliard Avstraliya dollari (66 milliard AQSh dollari) talab qilinib, bu shartnoma Avstraliya dengiz floti tarixidagi eng qimmati bo‘lardi.
Fransiya tashqi ishlar vaziri Jan-Iv Le Drian shartnomaning bekor qilinishini “orqadan pichoq urish” deb atagan. Shuningdek, bekor bo‘lgan shartnoma tufayli Fransiya AQSh bilan birga Chesapik dengiz jangining 240 yilligiga bag‘ishlangan tantanalarni nishonlashdan bosh tortgan.
18-sentabr kuni Fransiya tashqi ishlar vaziri Jan-Iv Le Drian AQSh va Avstraliyadagi elchilarini maslahatlashuvlar uchun Parijga chaqirib olayotgani haqida xabar berildi. 22-sentabr kuni esa Emmanuel Makron Filipp Etyenga Vashingtonga qaytishni buyurdi.
28-sentabr kuni Makron Fransiya elchisi “yangi majburiyatlar shartlarini belgilash uchun muzokaralar o‘tkazish haqidagi aniq topshiriq bilan” Vashingtonga qaytishini e’lon qildi. Davlat rahbari, shuningdek, oktabr oyida AQSh prezidenti Jo Bayden bilan mamlakatlar o‘rtasidagi munosabatlarni muhokama qilish niyatida ekanini aytdi.
Izoh (0)