Fransiya sobiq prezidenti Nikolya Sarkozi 2012-yilgi saylov kampaniyasiga ortiqcha mablag‘ sarflagani uchun bir yilga ozodlikdan mahrum etildi. Bu haqda BFM.TV xabar berdi.
Sarkozi muddatini qamoqda emas, uyda o‘tkazishi mumkin, lekin buning uchun undan elektron bilaguzuk taqib yurish talab etiladi.
Le Monde nashrining xabar berishicha, prokuror Sarkozini bir yilga ozodlikdan mahrum qilishni, shundan olti oyi shartli jazo bo‘lishini, shuningdek, unga 3750 yevro miqdorida jarima solinishini talab qilgan.
Sud xulosasiga ko‘ra, Sarkozi hisobchilarning ogohlantirishlarini e’tiborsiz qoldirib, saylovchilarni yutib olish uchun xarajatlarni qonun hujjatlarida belgilangan me’yordan oshirgan: saylov kampaniyasini moliyalashtirish Sarkoziga 42,7 million yevroga tushdi, bu qonun bilan ruxsat etilgan summadan qariyb ikki barobar ko‘pdir, deb yozadi Bloomberg.
Sudning fikricha, Sarkozi mavjud qonuniy cheklovlardan xabardor bo‘lgan, lekin ortiqcha xarajat qilmaslik uchun hech qanday chora ko‘rmagan.
Sarkozining o‘zi ayblovni tan olmadi va “o‘z sha’nini jon-jahdi bilan himoya qilishga” tayyorligi haqida gapirdi. Hukm chiqayotgan paytda Sarkozi sudda bo‘lmagan, deb xabar beradi BFM.TV. Keyinroq Sarkozining advokati Terri Xerzog sobiq prezident apellyatsiya bermoqchiligini ma’lum qildi.
2012-yilda Sarkozi “Xalq harakati uchun ittifoq” partiyasi nomzodi sifatida ishtirok etgan saylov kampaniyasiga Bygmalion piar agentligi xizmat ko‘rsatgan. Ortiqcha xarajatlarni sir tutish maqsadida agentlik partiyaning saylovoldi shtabiga taqdim etilmagan xizmatlar uchun 10 million yevro miqdoridagi soxta hisob-fakturalarni rasmiylashtirgan. Tergov davomida bu miqdor deyarli ikki barobar ko‘p bo‘lib chiqdi. Shundan so‘ng fransuz va jahon matbuotida ortiqcha xarajat nizosi ushbu kompaniya nomi bilan Bygmalion Affair deb ataladigan bo‘ldi.
Sarkozi bilan birga mazkur ish bo‘yicha yana 13 kishi jumladan, uning saylovoldi kampaniyasi direktorining o‘rinbosari va UMP prezidentining sobiq o‘rinbosari Jerom Lavriyo aybdor deb topildi. Lavriyo uch yilga ozodlikdan mahrum etildi, shundan ikki yilni qamoqda o‘tkazadi. Avvalroq u Bygmalion piar agentligiga xarajatlarni yashirish uchun to‘langan mablag‘larni qayta yo‘naltirishga mas’ullik qilganini ochiqchasiga tan olgandi. U o‘z tashabbusi bilan harakat qilganini aytgan. Sud bu sxemani tashkil etishga Sarkozi boshchilik qilganini isbotlay olmadi.
Eslatib o‘tamiz, 1-mart kuni Parij sudi Sarkozini korrupsiya va mansabni suiiste’mol qilganlik bilan bog‘liq ishda ayblab, unga bir yillik qamoq jazosi va ikki yillik shartli qamoq jazosini tayinlagan edi. Ushbu ish bo‘yicha yana ikki sudlanuvchi — Sarkozining sobiq advokat Tyerri Erzog va sobiq prokuror Jilber Aziberga ham xuddi shunday jazo tayinlangan.
2012-yilda Fransiyada bo‘lib o‘tgan prezidentlik saylovlarida Sarkozidan tashqari Fransua Olland (Sotsialistik partiya) va Marin Le Pen (Milliy front) qatnashgan edi. Olland va Sarkozi ikkinchi turga kirgan. Natijada Olland prezident bo‘ldi, uni saylovchilarning 51,64 foizi qo‘llab-quvvatlagan.
Izoh (0)