Чехия пойтахти Прага яқинида жойлашган Черношицe шаҳар муниципалитети унинг маъмурий ҳудудида яшовчи бош вазир ва миллиардер Андрей Бабишга 250 минг крон (тахминан, 11 минг доллар) миқдорида жарима солди. Бу ҳақда 30 сентябрь куни Denik Právo газетасига таяниб, «ТАСС» хабар берди.
Чехия бош вазири давлат ва ўз манфаатларининг тўқнашуви муносабати билан жаримага тортилди. Январь ойида муниципалитетга Transparency International ташкилотидан шикоят келиб тушган, ташкилот Бабишни ўзига тегишли оммавий ахборот воситалари орқали жамоатчилик фикрининг шаклланишига таъсир қилганликда гумонлаган. Шикоят маъмурий тартибда кўриб чиқилди.
Коррупцияга қарши курашувчи ушбу нодавлат халқаро ташкилот уч йил олдин ҳам Черношицe муниципалитетига Чехия бош вазири устидан худди шундай шикоят юборганди. Амалдаги қонунчиликка кўра маъмурий низоларни кўриб чиқиш билан шуғулланадиган маҳаллий ҳокимият органлари томонидан узоқ кўриб чиқилгандан сўнг, шикоят рад этилган.
Аввалроқ Бабиш Transparency International ташкилотининг хатти-ҳаракатларини изоҳлар экан, ўзини катта сиёсатдан четлатишга уринишаётганини айтди. Унинг таъкидлашича, ташкилотнинг ҳаракатлари ортида сиёсий рақиблари турибди. Сиёсатчининг адвокати Черношицe муниципалитетининг маъмурий ҳукмига норозилик билдирган.
Аввалроқ Чехия собиқ президенти ниқобни нотўғри таққани учун 3 минг крона (137 доллар) жаримага тортилганди.
Мавзуга доир:
Изоҳ (0)