Rossiya Tergov qo‘mitasining Kabarda-Bolqoriya Respublikasi bo‘yicha boshqarmasi Elbrus tog‘iga safar tashkilotchisini hibsga olganini ma’lum qildi. Safar davomida Rossiyaning turli hududlaridan kelgan besh nafar sayyoh halok bo‘lgandi. Baza nashrining aniqlik kiritishicha, qo‘lga olingan shaxs — Pyatigorsk okrugidagi Elbrus.Guide kompaniyasining egasi va katta yo‘lboshchisi sankt-peterburglik tadbirkor Denis Alimov. 27-sentabr kuni gumonlanuvchining o‘zi Kabarda-Bolqoriya poytaxti Nalchikda hibsga olinganini aytdi.
“Alimov ikki oyga hibsga olindi”, — deya xabar berdi “Interfaks” Rossiya Tergov qo‘mitasining Kabarda-Bolqoriya bo‘yicha boshqarmasiga tayanib.
Tergov qo‘mitasi ma’lumotlariga ko‘ra, safar ishtirokchilarining vafotidan keyin boshlangan jinoyat ishi yuzasidan Alimov xavfsizlik talablariga javob bermaydigan xizmatlar ko‘rsatish bo‘yicha so‘roq qilingan. Baza ma’lumotlariga ko‘ra, u tog‘ga chiqishni rejalashtirishda go‘yoki oy va ob-havo hisobida adashganini aytgan. Tergov qo‘mitasi “safar tashkilotchisi iqrornoma yozib murojaat qilgani va batafsil ko‘rsatmalar berganini” aytdi, shundan so‘ng tergovchilar uni hibsga olishga qaror qilgan. Tergov qo‘mitasi uni hibsga olish uchun sudga ariza bergan.
Elbrusga chiqish paytida sayyohlar halok bo‘lgach, Denis Alimov birinchi jabrlangan ayolni pastga tushirib ketgan gidning gaplariga asoslanib, jurnalistlarga tog‘da nima bo‘lganini batafsil aytib berdi. Tog‘ga uyushtirilgan safarda 19 kishi ishtirok etgan, ulardan to‘rt nafari professional alpinistlar bo‘lgan. 23-sentabrga o‘tar kechasi, Alimovning so‘zlariga ko‘ra, guruh Elbrus biqiniga qarab yo‘l olgan. “Biz tun bo‘yi yurdik, chunki ob-havo yaxshi edi. Juda zo‘r bo‘lmasa-da, u keyingi besh kun uchun ma’qul variant edi”, — dedi u.
Guruh Elbrus biqinining tepasida joylashgan yassilikka 23-sentabr kuni ertalab soat 10 larda yetib keldi, Alimovning so‘zlariga ko‘ra, bu “kech” edi. U yerda safar ishtirokchilaridan birining mazasi qochgan, shundan so‘ng gidlar pastroqda ahvoli yaxshilanishiga umid qilib, ayolni tog‘ beliga tushirishga qaror qilgan. Ertalab soat 11 larda gidlardan biri Igor Dankov va ayol pastga tushishni boshladi. Bu vaqtda ob-havo yomonlashgan: kuchli shamol esib, kuchli qor yog‘gan, buning natijasida atrofni ko‘rish darajasi yarim metrga tushib ketgan. Pastda turist ayolning ahvoli yomonlashib, u hushini yo‘qotgan va gidning qo‘lida vafot etgan. “Gid unga nashatir hidlatgan, choy ichirgan. Ammo hech narsa yordam bermagan”, — dedi Alimov.
Gid marhum ayolning jasadi yoniga belgi qo‘yib, so‘ng bir necha soat davomida guruhning qaytishini kutgan. Igor Dankov qutqaruvchilar bilan ratsiya orqali bog‘lanishga uringan, lekin falokat signali qabul qilinmagan. Gid guruh yo‘ldan adashgan deb qarorga kelib, tog‘dan tusha boshlagan.
Alimov gidning harakatlarini to‘g‘ri deb atadi. Kechqurun soat 5 larda gid aloqaga chiqqan, u koordinator bilan bog‘lanib, guruh yo‘qolgani haqida Favqulodda vaziyatlar vazirligiga xabar berishni so‘ragan.
Jabrlanuvchilarning so‘zlariga ko‘ra, guruhning qolgan a’zolari ob-havo yomonlashganda tog‘dan tusha boshlagan: bo‘ron boshlanib, havo harorati -20 darajagacha tushib ketgan va shamol tezligi sekundiga 40—70 metrgacha ko‘tarilgan. Alpinistlar to‘da bo‘lib tushgan, lekin to‘satdan sayyohlardan biri yiqilib, oyog‘ini sindirib olgan, bu esa harakatlanishni murakkablashtirgan. Alimovning aytishicha, bu halokatga sabab bo‘lgan: “Jarohatlangan oyoq tekshirilayotgan paytda qolgan ishtirokchilar muzlay boshlagan”. Tushish paytida ikki kishi hushidan ketib, vafot etgan. Uch gid guruhni uch qismga ajratib, pastga tushishni boshlagan. Guruhlardan birida yana ikki kishi vafot etgan, ular 3900 metr balandlikdagi chang‘i liftiga zambilda olib ketilgan. Qolgan sayyohlar Favqulodda vaziyatlar vazirligi gidlari yoki qutqaruvchilari bilan pastga tushgan.
Avvalroq Tergov qo‘mitasi dastlabki ma’lumotlarga asoslanib, safarning besh ishtirokchisi o‘limiga qattiq sovuq urishi sabab bo‘lganini aytgandi. Tog‘da qutqarilgan yana 14 kishi kasalxonaga yotqizilgan. Safarda qatnashgan gidlar qattiq muzlab qoldi, dedi Denis Alimov. Uning so‘zlariga ko‘ra, ikki gid haliyam kasalxonada, qolgan ikki nafari uyiga qaytgan. “Ularga hali hech qanaqa ayblov e’lon qilinmagan”, — dedi u.
Ma’lumot uchun: Alpinizmda “ob-havo oynasi” degan atama bor, bu musson yomg‘irlari yaqinlashishi oldidan toqqa chiqish prinsipial jihatdan mumkin bo‘ladigan yaxshi ob-havoli kunlar.
Izoh (0)