Франция собиқ президенти Николя Саркози 2012 йилги сайлов кампаниясига ортиқча маблағ сарфлагани учун бир йилга озодликдан маҳрум этилди. Бу ҳақда BFM.ТV хабар берди.
Саркози муддатини қамоқда эмас, уйда ўтказиши мумкин, лекин бунинг учун ундан электрон билагузук тақиб юриш талаб этилади.
Le Monde нашрининг хабар беришича, прокурор Саркозини бир йилга озодликдан маҳрум қилишни, шундан олти ойи шартли жазо бўлишини, шунингдек, унга 3750 евро миқдорида жарима солинишини талаб қилган.
Суд хулосасига кўра, Саркози ҳисобчиларнинг огоҳлантиришларини эътиборсиз қолдириб, сайловчиларни ютиб олиш учун харажатларни қонун ҳужжатларида белгиланган меъёрдан оширган: сайлов кампаниясини молиялаштириш Саркозига 42,7 миллион еврога тушди, бу қонун билан рухсат этилган суммадан қарийб икки баробар кўпдир, деб ёзади Bloomberg.
Суднинг фикрича, Саркози мавжуд қонуний чекловлардан хабардор бўлган, лекин ортиқча харажат қилмаслик учун ҳеч қандай чора кўрмаган.
Саркозининг ўзи айбловни тан олмади ва «ўз шаънини жон-жаҳди билан ҳимоя қилишга» тайёрлиги ҳақида гапирди. Ҳукм чиқаётган пайтда Саркози судда бўлмаган, деб хабар беради BFM.ТV. Кейинроқ Саркозининг адвокати Терри Херзог собиқ президент апелляция бермоқчилигини маълум қилди.
2012 йилда Саркози «Халқ ҳаракати учун иттифоқ» партияси номзоди сифатида иштирок этган сайлов кампаниясига Бйгмалион пиар агентлиги хизмат кўрсатган. Ортиқча харажатларни сир тутиш мақсадида агентлик партиянинг сайловолди штабига тақдим этилмаган хизматлар учун 10 миллион евро миқдоридаги сохта ҳисоб-фактураларни расмийлаштирган. Тергов давомида бу миқдор деярли икки баробар кўп бўлиб чиқди. Шундан сўнг француз ва жаҳон матбуотида ортиқча харажат низоси ушбу компания номи билан Bygmalion Affair деб аталадиган бўлди.
Саркози билан бирга мазкур иш бўйича яна 13 киши жумладан, унинг сайловолди кампанияси директорининг ўринбосари ва UМP президентининг собиқ ўринбосари Жером Лавриё айбдор деб топилди. Лавриё уч йилга озодликдан маҳрум этилди, шундан икки йилни қамоқда ўтказади. Аввалроқ у Bygmalion пиар агентлигига харажатларни яшириш учун тўланган маблағларни қайта йўналтиришга масъуллик қилганини очиқчасига тан олганди. У ўз ташаббуси билан ҳаракат қилганини айтган. Суд бу схемани ташкил этишга Саркози бошчилик қилганини исботлай олмади.
Эслатиб ўтамиз, 1 март куни Париж суди Саркозини коррупция ва мансабни суиистеъмол қилганлик билан боғлиқ ишда айблаб, унга бир йиллик қамоқ жазоси ва икки йиллик шартли қамоқ жазосини тайинлаган эди. Ушбу иш бўйича яна икки судланувчи — Саркозининг собиқ адвокат Тьерри Эрзог ва собиқ прокурор Жилбер Азиберга ҳам худди шундай жазо тайинланган.
2012 йилда Францияда бўлиб ўтган президентлик сайловларида Саркозидан ташқари Француа Олланд (Социалистик партия) ва Марин Ле Пен (Миллий фронт) қатнашган эди. Олланд ва Саркози иккинчи турга кирган. Натижада Олланд президент бўлди, уни сайловчиларнинг 51,64 фоизи қўллаб-қувватлаган.
Изоҳ (0)