Андижон вилоятининг барча шаҳар ва туманларида йил охирига қадар кун-у тун ишлайдиган савдо ва хизматлар учун биттадан махсус кўчалар ташкил этилади. Бу ҳақда «Дарё» мухбири Умиджон Мамарасулов хабар бермоқда.
Вилоят ҳокимлиги ахборот хизматининг маълум қилишича, давлат раҳбарининг 2021 йил майдаги «Хизматлар соҳасини жадал ривожлантириш чора-тадбирлари тўғрисида»ги қарори ижросини таъминлаш мақсадида барча шаҳар ва туманлар марказларида йил охирига қадар биттадан савдо ва кўнгилочар ҳудудлар ташкил этилиши белгиланган. Вилоятда мана шундай кўнгилочар, савдо ва хизмат кўрсатишга ихтисослашган йирик маскан Андижон шаҳридаги Бобур шоҳкўчасининг дастлабки 400 метр қисми — «Янги бозор» деҳқон бозори ҳудуди атрофида ташкил этилади.Бунинг учун жами 53 миллиард сўмлик 129 та лойиҳа шакллантирилган. Мазкур кўчада салқин ичимликлар, миллий ҳунармандчилик савдо мажмуаси, велосипед ижара хизмати, ширинликлар, музқаймоқ дўкони, умумий овқатланиш шохобчаси ва болалар аттракционлари ташкил этилади. Лойиҳалар ишга тушиши натижасида 1 минг 450 та янги иш ўрни яратилиши мумкин.
Аввалроқ, 2021 йилнинг 22 апрель куни Президент Шавкат Мирзиёев раислигида ҳудудларда хизмат кўрсатиш соҳаси йўналишларини ривожлантириш масалалари бўйича ўтказилган видеоселектор йиғилишида шаҳар ҳамда аҳолиси 150 мингдан кўп бўлган туман марказларида савдо ва хизматлар учун махсус кўчалар ташкил этилиши белгиланганлиги, уларда 100 мингта тадбиркорлик субъектини жойлаштириш имкони мавжудлиги билдирилганди. Шунингдек, савдо ва хизмат кўрсатиш объектларининг 24 соат мобайнида тун-у кун фаолият юритишига доир жамоат хавфсизлиги бўйича соддалаштирилган талаблар ўрнатилиши маълум қилинганди.
Изоҳ (0)