Qoraqalpog‘istonda o‘zini DTMda ishlashini aytib, 29 nafar abituriyentga o‘qishga kiritib qo‘yishni va’da qilgan shaxs qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departament hamda DXXning Qoraqalpog‘iston Respublikasi boshqarmalari tomonidan fuqarolarning huquq va manfaatlarini himoya qilish yuzasidan tezkor tadbir o‘tkazilgan.
Tadbir davomida R.E. ismli shaxs fuqaro Sh.ga go‘yoki o‘zini Davlat test markazida ishlovchi shaxs sifatida tanishtirib, unga Ali ismli tanishi orqali o‘qishga kira olmagan abituriyentlarning ballarini kirish ballariga tenglashtirib berishni va’da qilgani aniqlangan. U jami 29 nafar abituriyentni o‘qishga kiritib qo‘yish evaziga 83 ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent viloyatida yuridik universitetga 18 ming dollar evaziga o‘qishga kiritmoqchi bo‘lgan shaxs va sobiq o‘qituvchi ushlangani, Surxondaryo va Farg‘onada fuqarolarni o‘qishga kiritib qo‘yish evaziga pul so‘ragan talabalar qo‘lga olingani to‘g‘risida xabar berilgandi.
Mavzuga doir:
- Toshkentda fuqaroning Qozog‘istondagi o‘qishini Samarqand tibbiyot institutiga ko‘chirib berish evaziga 5 ming dollar olgan shaxs ushlandi
- Buxoroda fuqaroni o‘qishga kiritishni va’da qilib, 60 mln so‘m so‘ragan ikki talaba ushlandi
- Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olindi
Izoh (0)